ഒമിക്രോൺ: വീട്ടുനിരീക്ഷണത്തിന്​ പുതിയ മാർഗനിർദേശം പുറത്തിറക്കി കേന്ദ്രസർക്കാർ

ന്യൂഡൽഹി: ഒമിക്രോൺ കേസുകൾ വർധിക്കുന്നതിനിടെ വീട്ടുനിരീക്ഷണത്തിന്​ പുതിയ മാർഗനിർദേശങ്ങൾ പുറത്തിറക്കി കേ​ന്ദ്രസർക്കാർ. കോവിഡ്​ സ്ഥിരീകരിച്ചാൽ ഏഴ്​ ദിവസം​ വീട്ടുനിരീക്ഷണത്തിൽ കഴിയണം. ​പോസ്റ്റീവായത്​ മുതൽ ഏഴ്​ ദിവസമാണ്​ വീട്ടിലെ ക്വാറന്‍റീൻ. പിന്നീട്​ തുടർച്ചയായ മൂന്ന്​ ദിവസം പനിയില്ലെങ്കിൽ വീട്ടുനിരീക്ഷണം അവസാനിപ്പിക്കാം. ഹോം ഐസോലേഷൻ അവസാനിപ്പിക്കുന്ന സമയത്ത്​ വീണ്ടും കോവിഡ്​ പരിശോധന നടത്തേണ്ട ആവശ്യമില്ല.

കോവിഡ്​ ബാധിച്ച്​ ലക്ഷണങ്ങളൊന്നും ഇല്ലാത്തവർക്കാണ്​ വീട്ടുനിരീക്ഷണത്തിൽ കഴിയാൻ സാധിക്കുക. ഇവരുടെ രക്​തിലെ ഓക്സിജന്‍റെ അളവ്​ 93 ശതമാനമോ അതിലധികമോ വേണമെന്നും നിബന്ധനയുണ്ട്​. മറ്റ്​ അസുഖങ്ങളുള്ള വയോധികർക്ക്​ കർശന പരിശോധനകൾക്ക്​ ശേഷം മാത്രമേ വീട്ടുനിരീക്ഷണം അനുവദിക്കാവു.

രാജ്യത്ത്​ ​പ്രതിദിന കോവിഡ്​ രോഗികളുടെ എണ്ണം 50,000 കടന്നതോടെയാണ്​ വീട്ടുനിരീക്ഷണത്തിന്​ കേന്ദ്രസർക്കാർ പുതിയ മാർഗനിർദേശങ്ങൾ പുറപ്പെടുവിച്ചത്​. 24 മണിക്കൂറിനിടെ 58,097 പേർക്കാണ്​ രാജ്യത്ത്​ പുതുതായി രോഗം ബാധിച്ചത്​. കഴിഞ്ഞ വർഷം ജൂണിന്​ ശേഷമുള്ള ഏറ്റവും ഉയർന്ന കണക്കാണിത്​.

കഴിഞ്ഞ ദിവസം 534 പേർ മഹാമാരി ബാധിച്ച്​ മരിച്ചതായി ആരോഗ്യ മന്ത്രാലയം അറിയിച്ചു.കോവിഡ്​ ബാധിച്ച്​ മരിച്ചവരുടെ എണ്ണം 482,551 ആയി. ഇന്ത്യയിൽ ഇതുവരെ 3.502 കോടി പേർക്കാണ്​ കോവിഡ്​ ബാധിച്ചത്​. പ്രതിദിന രോഗബാധ 4.18 ശതമാനമായി ഉയർന്നു.

രാജ്യത്ത്​ ഒമിക്രോൺ കേസുകളുടെ എണ്ണം 2135 ആയി ഉയർന്നു. ഡൽഹിയിലും മഹാരാഷ്ട്രയിലുമാണ്​ ഏറ്റവും കൂടുതൽ ഒമിക്രോൺ ബാധിതരുള്ളത്​. കഴിഞ്ഞ ദിവസം 15,389 പേർ രോഗമുക്തി നേടി. ഇതുവരെ 3,43,21,803 പേരാണ്​ രാജ്യത്ത്​ കോവിഡ്​ മുക്തരായത്​. മൂന്നാം തരംഗത്തെ തുടർന്ന്​ ഡൽഹിയും കർണാടകയും വാരാന്ത്യ കർഫ്യൂ ഏർപെടുത്തിയിരുന്നു.