ഹണിപ്രീതി​െൻറ മുൻകൂർ ജാമ്യാപേക്ഷ തള്ളി; കീഴടങ്ങാൻ നിർദേശം

ന്യൂഡൽഹി: വിവാദ ആൾദൈവം ഗുർമീത്​ റാം റഹീം സിങ്ങി​​െൻറ വളർത്തുമകൾ ഹണിപ്രീതി​​െൻറ മുൻകൂർ ജാമ്യാപേക്ഷ ഹൈകോടതി തള്ളി. ജാമ്യാപേക്ഷ പരിഗണിച്ച ജസ്​റ്റിസ്​ സംഗീത ധിൻഗര സേഗാൾ ഹണിപ്രീതിനോട്​ പൊലീസിന്​ ​ മുമ്പാകെ കീഴടങ്ങാനും നിർദേശം നൽകി.

അതേ സമയം, ഹണിപ്രീതിനെ കണ്ടെത്തുന്നതിനുള്ള ശ്രമങ്ങൾ പൊലീസ്​ ഉൗർജിതമാക്കി. ചൊവ്വാഴ്​ച ദേര സച്ചായുടെ ഉടമസ്ഥതയിലുള്ള സ്ഥലത്ത്​ പൊലീസ്​ പരിശോധന നടത്തിയെങ്കിലും കണ്ടെത്താൻ സാധിച്ചില്ല.

ഗുർമീതിനെ ശിക്ഷിച്ചതിനെ തുടർന്ന്​ പഞ്ച്​ഗുളയിലെ കോടതി പരിസരത്ത്​ ഉണ്ടായ കലാപങ്ങൾ ആസൂത്രണം ചെയ്​തതിൽ ഹണിപ്രീതിനും പങ്കുണ്ടെന്നായിരുന്നു പൊലീസ്​ കണ്ടെത്തൽ. കോടതിയിൽ നിന്ന്​ ഗുർമീതിനെ രക്ഷപ്പെടുത്താൻ ഹണിപ്രീതും കൂട്ടരും ശ്രമിച്ചുവെന്നും ആരോപണമുണ്ട്​.