ജനങ്ങൾ മാസ്​ക്​ ധരിച്ചാൽ ബ്യൂട്ടി പാർലറുകൾ എങ്ങനെ പ്രവർത്തിക്കും? -അസം ആരോഗ്യ മന്ത്രി

ദിസ്​പുർ: സംസ്​ഥാനത്ത്​ കോവിഡ്​ അപ്രത്യക്ഷമായതിനാൽ മുൻകരുതൽ നടപടികളുടെ ഭാഗമായി മാസ്​ക്​ ധരിക്കേണ്ട ആവശ്യമില്ലെന്ന്​ അസം ആരോഗ്യമന്ത്രി ഹിമന്ത ബിശ്വ ശർമ. മാസ്​ക്​ ധരിച്ച്​ ആളുകൾ ഭീതി പരത്തുകയ​ാണ്​. അസമിൽ അതിന്‍റെ ആവശ്യമില്ലെന്നും മന്ത്രി പറഞ്ഞു.

രാജ്യത്ത്​ കോവിഡ്​ ബാധിതരുടെ എണ്ണം പ്രതിദിനം ഒരുലക്ഷത്തോട്​ അടുക്കു​കയും മരണസംഖ്യ കുത്തനെ ഉയരുകയും ചെയ്യു​േമ്പാഴാണ്​ മന്ത്രിയുടെ പ്രസ്​താവന.

'കേന്ദ്രം നിർദേശങ്ങളും മാർഗനിർദേശങ്ങളും നൽകും. എന്നാൽ അസമിലെ കാര്യം നോക്കു​േമ്പാൾ ഇപ്പോൾ ഇവിടെ കോവിഡ്​ ഇല്ല. മഹാമാരി തിരിച്ചുവരികയാണെങ്കിൽ മാസ്​ക്​ ധരിക്കാൻ ജനങ്ങളോട്​ ആവശ്യപ്പെടും'- ഹിമന്ത പറഞ്ഞു.

സംസ്​ഥാനത്തിന്‍റെ സമ്പദ്​ വ്യവസ്​ഥയെ പുനരുജ്ജീവിപ്പിക്കുന്നതിനാണ്​ സർക്കാർ ശ്രമം. ജനങ്ങൾ മാസ്​ക്​ ധരിച്ച്​ നടന്നാൽ ബ്യൂട്ടി പാർലറുകൾ എങ്ങനെ പ്രവർത്തിക്കും. ബ്യൂട്ടി പാർലറുകളിലും പ്രവർത്തനങ്ങൾ തുടരണം. അതൊരു ഇടക്കാല ആശ്വാസമായി കണക്കാക്കാം. കോവിഡ്​ 19 ഭീഷണി വീണ്ടും തിരിച്ചുവരികയാണെങ്കിൽ ജനങ്ങളോട്​ വീണ്ടും മാസ്​ക്​ ധരിക്കാൻ ആവശ്യപ്പെടും. ലംഘിച്ചാൽ 500 രൂപ പിഴയും ഈടാക്കും -ഹിമന്ത പറഞ്ഞു.

ബിഹുവിന്​ സംസ്​ഥാനത്ത്​ യാതൊരുവിധ നിയന്ത്രണങ്ങളുമുണ്ടാകില്ല. ഗംഭീരമായി ആഘോഷിക്കാം. ബിഹുവിന് പോലും കോവിഡ്​ ഭീഷണിയുണ്ടാകില്ലെന്ന ഉറപ്പുണ്ടെന്നും ഹിമന്ത ബിശ്വ ശർമ പറഞ്ഞു.

കോവിഡ്​ 19ന്‍റെ നിയന്ത്രണങ്ങൾ എടുത്തുകളയുന്നതിൽ വിദഗ്​ധരുടെ അഭി​പ്രായം തേടേണ്ട ആവശ്യമില്ല. പ്രതിദിനം 100 കോവിഡ്​ കേസുകളെങ്കിലും റിപ്പോർട്ട്​ ​െചയ്യുകയാണെങ്കിൽ ജന​ങ്ങളോട്​ മാസ്​ക്​ ധരിക്കാൻ ആവശ്യപ്പെടും. അസം സാമ്പത്തിക വളർച്ച 18-19 ശതമാനം രേഖപ്പെടുത്തുന്നുന്നുണ്ട്​. ജനങ്ങൾ ഒരു വർഷത്തോളം കഷ്​ടത അനുഭവിച്ചതിനാൽ ആശ്വാസം നൽകണം. കോവിഡ്​ 19​, ലോക്​ഡൗൺ എന്നിവ ഉയർത്തിക്കാട്ടി ജനങ്ങളെ ഭയപ്പെടുത്തരുത്​. കേന്ദ്രം നിർദേശങ്ങൾ നൽകും. സംസ്​ഥാനത്ത്​ കോവിഡ്​ ബാധിതരുടെ എണ്ണം കൂടുകയാണെങ്കിൽ അവ കർശനമായി അനുസരിക്കും -ഹിമന്ത കൂട്ടിച്ചേർത്തു.