കരിനിയമങ്ങൾക്കെതിരെ നാളെ ദ്വീപിൽ നിരാഹാര സമരം; കടയടച്ച്​ പിന്തുണക്കുമെന്ന്​​ വ്യാപാരികൾ

കവരത്തി: ലക്ഷദ്വീപ്​ അഡ്​മിനിസ്​ട്രേറ്റർ ഇറക്കിയ കരിനിയമത്തിനെതിരെ തിങ്കളാഴ്​ച ദ്വീപുനിവാസികൾ ആഹ്വാനം ചെയ്​ത നിരാഹാരസമരത്തിന്​ പിന്തുണ പ്രഖ്യാപിച്ച്​ വ്യാപാരികൾ കട അടച്ചിടും. ഇതോടെ ജനവാസമുള്ള മുഴുവൻ ദ്വീപുകളിലും നാളെ ഹർത്താലിന്​ സമാനമായ അവസ്ഥയായിരിക്കും. ദ്വീപിലെ വിവാദ നടപടികൾക്കെതിരെ സേവ് ലക്ഷദ്വീപ് ഫോറമാണ്​ നിരാഹാര സമരം ആഹ്വാനം ചെയ്തിരിക്കുന്നത്​.

വർഷങ്ങൾക്ക്​ ശേഷമാണ്​ ദ്വീപ്​ ഹർത്താലിന്​ സാക്ഷ്യം വഹിക്കുന്നത്​. 2010 ​ൽ ചില ദ്വീപുകളിൽ വ്യാപാരികൾ ഹർത്താൽ നടത്തിയിരുന്നു. എന്നാൽ മുഴുവൻ ദ്വീപുകളിലും ഒരുമിച്ച്​ കടകൾ അടച്ചിടുന്നതും കരിദിനം ആചരിക്കുന്നതും ചരിത്രത്തിലാദ്യമായാണെന്ന്​ ദ്വീപ്​ നിവാസികൾ ഓർക്കുന്നു.

അഡ്മിനിസ്ട്രേറ്ററുടെ ജനവിരുദ്ധ നയങ്ങൾക്കെതിരെ ദ്വീപുനിവാസികൾ കടുത്ത പ്രതിഷേധത്തിലാണ്​. ഓരോ ദിവസം പുതിയ കരിനിയമങ്ങളാണ്​ അഡ്​മിനിസ്​ട്രേറ്ററുടെ നേതൃത്വത്തിൽ ദ്വീപിൽ നടപ്പാക്കുന്നത്. ഇതിനെതിരെയുള്ള പരസ്യപ്രതിഷേധങ്ങളുടെ ഭാഗമാണ്​ നിരാഹാരസമരവും കടയടച്ചിടലുമൊക്കെ.