ഹൈഡ്രോക്സിക്ലോറോക്വിൻ നിർമ്മാതാക്കൾക്ക് എല്ലാ സഹായവും നൽകും -ഹിമാചൽ പ്രദേശ്​

ഷിംല: മലേറിയക്കുളള മരുന്നായ ഹൈഡ്രോക്സിക്ലോറോക്വി​​െൻറ നിർമ്മാതാക്കൾക്ക് എല്ലാ സഹായവും നൽകുമെന്ന്​ ഹിമാചൽ പ്രദേശ്​ മുഖ്യമന്ത്രി ജയറാം താക്കൂർ. കോവിഡിന്​ പ്രതിവിധിയായി ഉപയോഗിക്കാമെന്ന്​ തെളിഞ്ഞതോടെ വൻ ഡിമാൻറാണ് ​ ഈ മരുന്നിന്​ ലോകരാഷ്​ട്രങ്ങളിൽനിന്ന്​ ഉയരുന്നത്​. ഇന്ത്യയാണ്​ ഇതി​​െൻറ മുഖ്യ ഉൽപാദകർ.

സോളൻ ജില്ലയിൽ യൂ ണിറ്റുകൾ ഉള്ള മരുന്ന്​ നിർമാതാക്കൾക്ക്​ എല്ലാ സഹായവും ഹിമാചൽ പ്രദേശ് സർക്കാരിൽ നിന്ന് ലഭിക്കുമെന്ന് മുഖ്യമന്ത്രി വ്യക്​തമാക്കി. വിതരണം സുഗമമാക്കുന്നതിന് ട്രക്കുകൾ അനുവദിക്കും. ബഡ്ഡി, ബറോട്ടിവാല, നലഗഡ്​ മേഖലകളിലാണ്​ ഫാർമസ്യൂട്ടിക്കൽ കമ്പനികളുള്ളത്​. പ്രവർത്തനം നിലച്ച സ്​ഥാപനങ്ങളിൽ നിർമാണം പുനരാരംഭിക്കാൻ നടപടിയെടുക്കുമെന്നും ഫാർമ കമ്പനികളുടെ പ്രതിനിധികളുമായി നടത്തിയ വീഡിയോ കോൺഫറൻസിൽ മുഖ്യമന്ത്രി അറിയിച്ചു.

തൊഴിലാളികൾക്ക്​ പോയി വരുന്നതിനും അസംസ്കൃത വസ്തുക്കളുടെയും മരുന്നുകളുടെയും വിതരണം ത്വരിതപ്പെടുത്തുന്നതിനും നടപടി സ്വീകരിക്കും. ലോകമെമ്പാടുമുള്ള ആവശ്യം നിറവേറ്റാൻ 250 ഓളം നിർമാണ യൂണിറ്റുകൾ ഉത്പാദനം പുനരാരംഭിച്ചിട്ടുണ്ട്​. ഇത്​ അഭിനന്ദനാർഹമാണെന്നും മുഖ്യമന്ത്രി പറഞ്ഞു.