'ഞാനും ചോദിക്കുന്നു മോദിജീ, നമ്മുടെ കുട്ടികൾക്കുള്ള വാക്സിൻ എന്തിന് വിദേശത്തേക്ക് അയച്ചു? പ്രകാശ് രാജ്

ബംഗളുരു: വാക്സിൻ ക്ഷാമത്തിന് കാരണം പ്രധാനമന്ത്രി നരേന്ദ്രമോദിയുടെ നടപടിയാണെന്ന് വിമർശിച്ച്​ പോസ്റ്റർ ഒട്ടിച്ചതിനെ തുടർന്നുണ്ടായ അറസ്റ്റിൽ പ്രതിഷേധം രേഖപ്പെടുത്തി നടൻ പ്രകാശ് രാജ്. പോസ്റ്ററിൽ ചോദിച്ച കാര്യം താനും ചോദിക്കുന്നതായും, തന്നെയും അറസ്റ്റ് ചെയ്യണമെന്നും ആവശ്യപ്പെട്ടുകൊണ്ടാണ് നടൻ പ്രകാശ് രാജ് ട്വിറ്ററിലൂടെ രം​ഗത്തെത്തിയത്.

ഡൽഹിയിൽ രണ്ടു ദിവസം മുൻപ് 'മോദിജി, നമ്മുടെ കുട്ടികൾക്കുള്ള വാക്​സിൻ ​പ്രധാനമന്ത്രി എന്തിന്​ വിദേശരാജ്യങ്ങൾക്ക്​ അയച്ചുകൊടുത്തു​?' എന്നെഴുതിയ​ പോസ്റ്ററുകൾ പ്രത്യക്ഷപ്പെട്ടിരുന്നു. തുടർന്നാണ് അറസ്റ്റ് നടന്നത്. പോസ്റ്റർ പതിച്ചവരെ അറസ്റ്റ്​ ചെയ്​ത സംഭവത്തിൽ പ്രതിഷേധവുമായി കോൺഗ്രസ്​ നേതാവ്​ രാഹുൽ ഗാന്ധിയടക്കമുള്ള പ്രതിപക്ഷ നേതാക്കളും സാമൂഹിക പ്രവർത്തകരും രംഗത്തെത്തിയിരുന്നു.

I REPEAT "Modi ji, aapne humare bacchon ki vaccine videsh kyu bhej diya?"

Now .. Come .. Arrest me too #JustAsking https://t.co/ru5i9fPVeO

— Prakash Raj (@prakashraaj) May 15, 2021

അതേസമയം, ആം ആദ്​മി പാർട്ടി പ്രവർത്തകരാണ്​ പോസ്റ്റർ പതിച്ചതിന്​ പി​ന്നിലെന്ന്​​ പൊലീസ് പറഞ്ഞു​. പോസ്റ്റർ പതിച്ചതിനെതിരെ മേയ് 12ന്​​ പൊലീസിൽ പരാതി ലഭിച്ചതിനെ തുടർന്ന് എഫ്​.ഐ.ആർ രജിസ്റ്റർ ചെയ്യുകയും ​17ഓളം പേരെ അറസ്റ്റ്​ ചെയ്യുകയും ചെയ്​തിരുന്നു. സി.സി.ടി.വി ദൃശ്യങ്ങളടക്കം പരിശോധിച്ച്​ വിപുലമായ രീതിയിലായിരുന്നു അന്വേഷണം.