സ്​ഫോടന കേസുകളിലെല്ലാം വെള്ളം ചേർക്കുന്നുവെന്ന്​ രോഹിണി സാലിയാൻ 

മുംബൈ: തീവ്ര ഹിന്ദുത്വ സംഘടന അംഗങ്ങൾ പ്രതികളായ എല്ലാ കേസുകളും ദുർബലമാക്കാൻ അധികൃതർ ശ്രമിക്കുന്നതായി 2008 ലെ മാലേഗാവ്​ സ്​ഫോടന കേസിൽ പ്രത്യേക പബ്ലിക്​ പ്രോസിക്യൂട്ടറായിരുന്ന രോഹിണി സാലിയാൻ. 

2008 ലെ മാലേഗാവ് സ്​ഫോടന കേസും ഇൗയിടെ ഹൈദരാബാദിലെ പ്രത്യേക എൻ.െഎ.എ കോടതി പ്രതികളെ വെറുതെ വിട്ട മക്കമസ്​ജിദ്​ കേസും ഇവയിൽ ചിലതു​ മാത്രമാണെന്നും അവർ പറഞ്ഞു. 

2014 ൽ കേന്ദ്രത്തിൽ ബി.ജെ.പി അധികാരത്തിൽ വന്നതോടെ പ്രതികൾക്ക്​ എതിരെ മൃദുസമീപനം കൈക്കൊള്ളാൻ സർക്കാറിനുവേണ്ടി എൻ.െഎ.എ ഉദ്യോഗസ്​ഥൻ ആവശ്യപ്പെട്ടെന്ന്​ രോഹിണി സാലിയാൻ വെളിപ്പെടുത്തിയത്​ വിവാദമായിരുന്നു. ഇതേ തുടർന്ന്​ അവരെ കേസിൽനിന്ന്​ മാറ്റിയെങ്കിലും ഇതു സംബന്ധിച്ച വിജ്​ഞാപനം ഇതുവരെ നൽകിയിട്ടില്ല. 

തക്കസമയത്ത്​ കൂടുതൽ വെളിപ്പെടുത്തുമെന്നാണ്​ മക്കമസ്​ജിദ്​ കേസ്​ വിധിയുടെ പശ്ചാത്തലത്തിൽ അവർ പ്രതികരിച്ചത്​. 
2008 ലെ മാലേഗാവ്​ സ്​ഫോടന കേസിൽ വിചാരണ തുടങ്ങിയിട്ടില്ല. എന്നാൽ, മുഖ്യപ്രതികളിൽ ഒരാളായ സാധ്വി പ്രഞ്​ജാ സിങ്​ ഠാകുറടക്കം അഞ്ചു േപർക്ക്​ എതിരെ തെളിവുകളില്ലെന്നും മറ്റൊരു പ്രധാന പ്രതി ലഫ്​.കേണൽ ശ്രീകാന്ത്​ പുരോഹിത്​ ഉൾപ്പെടെ ശേഷിച്ചവർക്ക്​ എതിരെ മകോക നിയമം ചുമത്താനാവില്ലെന്നുമാണ്​​ എൻ.െഎ.എ കോടതിയിൽ എടുത്ത നിലപാട്​. 

സാലിയാനെ കേസിൽനിന്ന്​ മാറ്റിയശേഷമായിരുന്നു ഇൗ നിലപാട്​. ഇതോടെ കേസ്​ ദുർബലമാവുക മാത്രമല്ല സംഘടിത കുറ്റകൃത്യം എന്ന എ.ടി.എസി‍​​െൻറ കണ്ടെത്തൽ തകരുകയും ചെയ്​തു. ‘അഭിനവ്​ ഭാരത്​ ’ എന്ന സംഘടനയുടെ പ്രവർത്തകരാണ്​ കേസിലെ പ്രതികൾ. മക്കമസ്​ജിദ്​, സം​േഝാത എക്​സ്​പ്രസ്​, അജ്​മീർ ദർഗ, രണ്ട്​ മാലേഗാവ്​ സ്​ഫോടനങ്ങൾ, ഗുജറാത്തിലെ മൊദാസ തുടങ്ങിയ സ്​ഫോടനങ്ങൾക്കു പിന്നിലും ഇവർ തന്നെയാണെന്നായിരുന്നു എ.ടി.എസി‍​​െൻറ കണ്ടെത്തൽ. മാത്രമല്ല, രാജ്യത്തി‍​​െൻറ പരമാധികാരം തകർത്ത്​ ഇസ്രായേലി‍​​െൻറ സഹായത്തോടെ പുതിയ ഹിന്ദുരാഷ്​ട്രം സ്​ഥാപിക്കുന്നതിനുള്ള ഗൂഢാലോചന നടന്നതുവരെ 2008 ലെ മാലേഗാവ്​ സ്​ഫോടന കേസ്​ അന്വേഷണത്തിനിടെ എ.ടി.എസ്​ കണ്ടെത്തുകയും ശക്​തമായ തെളിവുകൾ ശേഖരിക്കുകയും ചെയ്​തതായി രോഹിണി സാലിയാൻ പറഞ്ഞു. ഹേമന്ത്​്​ കർക്കറെ എ.ടി.എസ്​ മേധാവി ആയിരിക്കെയായിരുന്നു ഇത്​. എന്നാൽ, മുംബൈ ഭീകരാക്രമണത്തിനിടെ അദ്ദേഹം കൊല്ലപ്പെട്ടതോടെ പരമാധികാരം അട്ടിമറിക്കാനുള്ള ഗൂഢാലോചന തെളിവുകൾ അപ്രത്യക്ഷമായി. 

മക്കമസ്​ജിദ്​ കേസിലെ പ്രതികൾക്കെതിരെ പുരോഹിത്​ അടക്കമുള്ള മാലേഗാവ്​ സ്​ഫോടന കേസ്​ പ്രതികളെ സാക്ഷിയാക്കിയതിലെ യുക്​തിയെയും രോഹിണി സാലിയാൻ ചോദ്യം ചെയ്​തു. സാക്ഷികൾ കൂറുമാറുമെന്ന്​ ഉറപ്പായിരുന്നു. കേസ്​ വിധിയിൽ കൗതുകം തോന്നിയില്ലെന്നും അവർ പറഞ്ഞു.