കോവിഡ്​ വ്യാപനം; ഗുവാഹത്തി ഐ.ഐ.ടി കാമ്പസ്​ കണ്ടെയ്​മെന്‍റ സോണാക്കി

ഗുവാഹത്തി: വൻതോതിൽ കോവിഡ്​ കേസുകൾ റിപ്പോർട്ട്​ ചെയ്തതിന്​ പിന്നാലെ ഗുവാഹത്തി ഇന്ത്യൻ ഇൻസ്റ്റിറ്റ്യൂട്ട്​ ടെക്​നോളജി കാമ്പസ്​ കണ്ടെയ്​ൻമെന്‍റ്​ സോണായി പ്രഖ്യാപിച്ചു. കാമ്പസിലെ 60ഓളം പേർക്കാണ്​ കഴിഞ്ഞദിവസങ്ങളിൽ രോഗം സ്ഥിരീകരിച്ചത്​.

രോഗബാധയുടെ പശ്ചാത്തലത്തിൽ കാമ്പസിനകത്തേക്ക്​ പ്രവേശനം നിരോധിച്ചതായി സർക്കാർ ഉത്തരവിറക്കി. കാമ്പസിനകത്തുള്ളവർക്ക്​ പുറത്തിറങ്ങാനും അനുവാദം നൽകില്ല.

ഐ.ഐ.ടി ഗുവാഹത്തിയിലെ പുതിയ ഗസ്റ്റ്​ ഹൗസിലാണ്​ രോഗവ്യാപനം രൂക്ഷം. രോഗം സ്ഥിരീകരിച്ചവരുടെ സാമ്പിളുകൾ ജനിതക ശ്രേണീകരണത്തിന്​ അയച്ചു. രോഗലക്ഷണമില്ലാത്തവരും ചെറിയ രോഗലക്ഷണങ്ങളുള്ളവരുമുണ്ടെന്ന്​ അധികൃതർ അറിയിച്ചു.

സ്വന്തം സംസ്ഥാനങ്ങളിൽനിന്ന്​ തിരിച്ചെത്തിയവരാണ്​ രോഗബാധിതരിൽ ഭൂരിഭാഗവും. എല്ലാവരെയും നിരീക്ഷണത്തിലാക്കി. നിലവിൽ ഓൺലൈനായാണ്​ ക്ലാസുകൾ.