രാത്രി കർഫ്യൂ, പകൽ ലക്ഷങ്ങളെ പ​​​​ങ്കെടുപ്പിച്ച്​ റാലി -യു.പി സർക്കാറിനെതിരെ വരുൺ ഗാന്ധി

ലഖ്​നോ: ഉത്തർപ്രദേശ്​ സർക്കാറിന്‍റെ കോവിഡ്​ നിയന്ത്രണങ്ങളെ രൂക്ഷമായി വിമർശിച്ച്​ ബി.ജെ.പി എം.പി വരുൺ ഗാന്ധി. ഒമിക്രോൺ വ്യാപനവും കോവിഡ്​ കേസുകളുടെ എണ്ണം കൂടുന്നതും കണക്കിലെടുത്തായിരുന്നു രാത്രി കർഫ്യൂ ഉൾപ്പെടെയുള്ള നിയന്ത്രണങ്ങൾ.

രാത്രിയിൽ കർഫ്യൂ ഏർപ്പെടുത്തുമെന്നും പകൽ ലക്ഷങ്ങൾ പ​ങ്കെടുക്കുന്ന റാലി സംഘടിപ്പിക്കുമെന്നും ബി.ജെ.പിയെയും സംസ്ഥാന സർക്കാറിനെയും വിമർശിച്ച്​ വരുൺ ഗാന്ധി ട്വീറ്റ്​ ചെയ്തു.

'രാത്രിയിൽ കർഫ്യൂ ഏർപ്പെടുത്തും, പകൽ ലക്ഷങ്ങളെ പ​​​​ങ്കെടുപ്പിച്ച്​ റാലി സംഘടിപ്പിക്കും. സാധാരണക്കാരുടെ സാമാന്യബുദ്ധിയെ വെല്ലുവിളിക്കുന്നതിനും അപ്പുറമാണിത്​. ഉത്തർപ്രദേശിന്‍റെ പരിമിതമായ ആരോഗ്യസംരക്ഷണ സംവിധാനങ്ങൾ കണക്കിലെടുക്കുമ്പോൾ, ഭയാനകമായ ഒമിക്രോൺ വ്യാപനം തടയുന്നതിനാണോ അതോ തെര​ഞ്ഞെടുപ്പ്​ ശക്തി പ്രകടനത്തിനാണോ മുൻഗണന നൽകേണ്ടതെന്ന്​ സത്യസന്ധമായി തീരുമാനിക്കണം' -വരുൺ ഗാന്ധി ട്വീറ്റ്​ ചെയ്തു.

ഒമിക്രോൺ വ്യാപനത്തിന്‍റെ പശ്ചാത്തലത്തിൽ യു.പിയിൽ രാത്രി 11 മണി മുതൽ പുലർച്ചെ അഞ്ചുമണി വരെ കർഫ്യൂ ഏർപ്പെടുത്തിയിട്ടുണ്ട്​. വിവാഹം, മറ്റ് ആഘോഷങ്ങൾ എന്നിവക്ക് 200ൽ കൂടുതൽ ആളുകൾ പങ്കെടുക്കാൻ പാടില്ല. പരിപാടികളിൽ പങ്കെടുക്കുന്നവർ നിർബന്ധമായും കോവിഡ് മാനദണ്ഡങ്ങൾ സ്വീകരിക്കണമെന്നും അധികൃതർ അറിയിച്ചു. അതേസമയം, ​സംസ്ഥാനം ഭരിക്കുന്ന ബി.ജെ.പിയുടെ ഉൾപ്പെടെ നിരവധി പ്രചാരണ പരിപാടികൾ സംസ്ഥാനത്ത്​ നടന്നുവരുന്നുണ്ട്​.