2016 തെരഞ്ഞെടുപ്പിൽ ബി.ജെ.പി ചെലവാക്കിയത്​ 43 കോടി, ജയം ഒരു സീറ്റിൽ മാത്രം

കോഴിക്കോട്​: 2016 നിയമസഭ തെരഞ്ഞെടുപ്പിൽ ബി.ജെ.പി കേരളത്തിൽ ചെലവഴിച്ചത്​ 43​ കോടി രൂപ. സി.പി.എം, സി.പി.ഐ, കോൺഗ്രസ്​ പാർട്ടികൾ മുടക്കിയതിന്‍റെ ഇരട്ടിത്തുകയാണ്​ ബി.ജെ.പി 2016ൽ ചെലവഴിച്ചത്​. എന്നാൽ പിടിച്ചെടുക്കാനായത്​ നേമം മണ്ഡലം മാത്രവും.

2016​ലെ തെരഞ്ഞെടുപ്പിൽ രാഷ്​ട്രീയ പാർട്ടികൾ തെരഞ്ഞെടുപ്പ്​ കമീഷന്​ സമർപ്പിച്ച വരവ്​ ചെലവ്​ കണക്കുകളിലാണ്​ ഇക്കാര്യം വ്യക്തമാക്കുന്നത്​. പൊതു യോഗങ്ങൾക്കും റാലികൾക്കുമായി 5.13 കോടി, സ്​ഥാനാർഥികൾക്കുവേണ്ടി ചെലവഴിച്ചത്​ 14.51 കോടി, സ്​ഥാനാർഥികൾക്ക്​ നൽകിയ തുക 13.5 കോടി എന്നിങ്ങനെയാണ്​ ചെലവഴിച്ച തുകകൾ.

സ്​ഥാനാർഥികൾക്കായി ചെലവഴിച്ച 28 കോടിയിൽ പരസ്യം, പൊതു ബോർഡുകൾ, വാഹനങ്ങൾ, റാലികൾ, ജാഥകൾ തുടങ്ങിയവ ഉൾപ്പെടും. അരുവിക്കര മണ്ഡലത്തിൽ മത്സരിച്ച എ. രാജസേനനാണ്​ ഏറ്റവും കൂടുതൽ തുക ലഭിച്ചത്​. 21ലക്ഷം രൂപ പ്രചാരണത്തിനായി നൽകി. ഏറ്റവും കുറവ്​ തുക ലഭിച്ചത് നേമം മണ്ഡലത്തിൽനിന്ന്​ മത്സരിച്ച്​ ജയിച്ച ഒ. രാജഗോപാലിനും. 1032 രൂപയാണ്​ രാജഗോപാലിന്​ ലഭിച്ചത്​. കോട്ടക്കൽ മണ്ഡലത്തിൽ മത്സരിച്ച വി. ഉണ്ണികൃഷ്​ണൻ മാസ്റ്റർക്ക്​ 19.49 ലക്ഷം ​രൂപയാണ്​ പ്രചാരണ പ്രവർത്തനങ്ങൾക്ക്​ നൽകിയത്​.

ബി.ജെ.പിയുടെ ​മുതിർന്നനേതാക്കൾ 264 തവണ​ വിവിധ മണ്ഡലങ്ങൾ സന്ദർശിച്ചു​. ഇവരുടെ ടാക്​സി, ഹെലികോപ്​ടർ വാടകയായി 1.31 കോടി ചെലവാക്കി. 660 പൊതു യോഗങ്ങളും കൺവെൻഷനുകളും നടത്തിയതിലൂടെ 2.63 കോടി ചെലവായതായും കണക്കുകൾ വ്യക്തമാക്കുന്നു.

ബി.ജെ.പി കേന്ദ്ര ആസ്​ഥാനം ചെലവഴിച്ചത്​ 14.75 കോടി രൂപയാണ്​. 5.64 കോടി രൂപ ഉന്നത നേതാക്കളുടെ സന്ദർശനത്തിനായി ഇവർ ചെലവാക്കി. കേന്ദ്ര ആഭ്യന്തരമന്ത്രി അമിത്​ ഷായും സംഘവും നാലുതവണയാണ്​ കേരളത്തിലെത്തിയത്​. ഇതിനായി ചെലവഴിച്ചത്​ 1.05 കോടിയും. മാധ്യമ പരസ്യങ്ങൾക്കായി 8.41കോടി രൂപ ചെലവഴിച്ചു. അരക്കോടിയിലധികം പൊതുയോഗങ്ങൾക്കും മുടക്കി.

രണ്ടുഘട്ടമായി ബി.ജെ.പി സംസ്​ഥാന യൂനിറ്റിന്​ ഏഴുകോടി രൂപയാണ്​ കേന്ദ്ര ആസ്​ഥാനത്തുനിന്നും ലഭിച്ചതെന്നും കണക്കിൽ പറയുന്നു. ജനറൽ പാർട്ടി പ്രവർത്തനങ്ങൾക്കായി ബി.ജെ.പി സംസ്​ഥാന നേതൃത്വം 14.1 കോടി രുപ ​ചിലവാക്കി. ഇതിൽ 2.63 കോടി മാധ്യമ പരസ്യങ്ങളും ആറുകോടി മറ്റു പരസ്യങ്ങൾക്കും ചെലവഴിച്ചു.​ 2.63 കോടി പൊതു യോഗങ്ങൾക്കും മറ്റും ചെലവാക്കി. 3.96 കോടി ബാക്കിയുണ്ടെന്നും കണക്കുകൾ വ്യക്തമാക്കുന്നു.

2016ൽ തെരഞ്ഞെടുപ്പ്​ പ്രഖ്യാപിച്ചതുമുതൽ അവസാനിച്ചതുവരെ വിവിധ ഉറവിടങ്ങളിൽനിന്നായി 28.79 കോടി രൂപയാണ്​ സി.പി.എമ്മിന്​ ലഭിച്ചത്​. ഇതിൽ 11 കോടി ജനറൽ പാർട്ടി പ്രവർത്തനങ്ങൾക്ക്​ ചെലവാക്കി.​ 10 കോടി മാധ്യമ പരസ്യങ്ങൾക്കും 92 ലക്ഷം പബ്ലിസിറ്റി ഉപകരണങ്ങൾക്കും ചെലവഴിച്ചു.

നേതാക്കള​ുടെ പ്രചാരണ പ്രവർത്തനങ്ങൾക്ക്​ 2.32 ​ലക്ഷം യാത്രചെലവായി. 11.5 ലക്ഷം രൂപയാണ്​ വിവിധ സ്​ഥാനാർഥികൾക്ക്​ പ്രചാരണ തുകയായി നൽകിയത്​. ഇതിൽ പി. ശ്രീരാമകൃഷ്​ണൻ, കെ. നിഷാന്ത്​, വി​.കെ.സി. മമ്മദ്​കോയ എന്നിവർക്കാണ്​ പ്രചാരണ തുക നൽകിയത്​.

8.7 കോടിയാണ്​ കോൺഗ്രസ്​ ചെലവാക്കിയത്​. ഇതിൽ 10 ലക്ഷം ഓരോ സ്​ഥാനാർഥികൾക്കും ചെലവിനായി നൽകി. പാർട്ടി ജനറൽ പ്രവർത്തനങ്ങൾക്കായി 41.06 ലക്ഷം ചെലവാക്കി.

2016ൽ 27 സീറ്റുകളിൽ മത്സരിച്ച സി.പി.​ഐ 8.27 കോടി രൂപയാണ്​ പ്രചാരണത്തിന്​ ചെലവാക്കിയത്​. ജില്ല സെക്രട്ടറിമാർക്ക്​ തെരഞ്ഞെടുപ്പ്​ പ്രവർത്തനങ്ങൾക്കായി 93.5 ലക്ഷം കൈമാറി. 6.21 കോടി ജനറൽ പാർട്ടി പ്രവർത്തനങ്ങൾക്ക്​ ചെലവാക്കി. 2.06 കോടി സ്​ഥാനാർഥികൾക്കായി ചെലവാക്കി. 7.5 കോടി രൂപയാണ്​ തെരഞ്ഞെടുപ്പ്​ പ്രഖ്യാപിച്ചതുമുതൽ സി.പി.ഐക്ക്​ ലഭിച്ചതെന്നും കണക്കുകൾ പറയുന്നു.

Latest Video: