ഗോവയി​ൽ എ.എ.പി സർക്കാർ അധികാരത്തിലെത്തിയാൽ അയോധ്യ രാമക്ഷേത്രത്തിലേക്ക്​ സൗജന്യയാത്ര -വാഗ്​ദാനവുമായി കെജ്​രിവാൾ

മുംബൈ: ഗോവ നിയമസഭ തെരഞ്ഞെടുപ്പിന്​ മുന്നോടിയായി വിശ്വാസികളെ കൈയിലെടുക്കാൻ പുതിയ പ്രഖ്യാപനങ്ങളുമായി ഡൽഹി മുഖ്യമന്ത്രിയും ആം ആദ്​മി പാർട്ടി നേതാവുമായ അരവിന്ദ്​ കെജ്​രിവാൾ. ഹിന്ദുക്കൾക്ക്​ അയോധ്യ രാമക്ഷേത്രത്തിലേക്കും മുസ്​ലിംകൾക്ക്​ അജ്​മീർ ഷെരീഫിലേക്കും ക്രിസ്​ത്യാനികൾക്ക്​ വേളാങ്കണ്ണിയിലേക്കും സൗജന്യ തീർഥാടനമാണ്​ വാഗ്​ദാനം.

തീർഥാടനത്തിന്​ ശേഷം ജനങ്ങൾ നല്ല മനസോടെ മടങ്ങിയെത്തുമെന്നും ഡൽഹിയിലെ എ.എ.പി സർക്കാർ നടപ്പാക്കിയ പദ്ധതിയാണിതെന്നും കെജ്​രിവാൾ പറഞ്ഞു. 2022 നിയമസഭ തെരഞ്ഞെടുപ്പിൽ എ.എ.പി സർക്കാർ അധികാരത്തിലെത്തിയാൽ ഗോവയിൽ ഇൗ പദ്ധതി നടപ്പിലാക്കുമെന്നും കെജ്​രിവാൾ പറഞ്ഞു.

'ഞങ്ങളുടെ സർക്കാർ രൂപീകരിച്ചാൽ അയോധ്യയിലേക്ക്​ സൗജന്യ തീർഥാടനം അനുവദിക്കുകയും ശ്രീരാമനെ ദർശിക്കാൻ അവസരമൊരുക്കുകയും ചെയ്യും. ക്രിസ്​ത്യാനികൾക്ക്​ വേളാങ്കണ്ണി സൗജന്യ തീർഥാടനം ഒരുക്കും. മുസ്​ലിംകൾക്ക്​ അജ്​മീർ ഷെരീഫിലേക്കും സൗജന്യ തീർഥാടന സൗകര്യമൊരുക്കും' -കെജ്​രിവാൾ പറഞ്ഞു.

ഗോവയിൽ നിരവധി​േപർ ഷിർദിയിൽ വിശ്വാസിക്കുന്നവരാണെന്ന്​ പറഞ്ഞിരുന്നു. അവർക്കായി ​സായ്​ ബാബയുടെ ഷിർദിയിലേക്കും സൗജന്യ തീർഥാടനം ഉറപ്പാക്കുമെന്നും കെജ്​രിവാൾ കൂട്ടിച്ചേർത്തു.

കുറച്ചുവർഷങ്ങൾക്ക്​ മുമ്പ്​ ഡൽഹി സർക്കാർ ഈ പദ്ധതി നടപ്പിലാക്കിയപ്പോൾ 35,000 ത്തോളം പേർക്ക്​ ആനുകൂല്യം ലഭിച്ചതായും കെജ്​രിവാൾ പറഞ്ഞു.

അടുത്തിടെ താൻ അയോധ്യയും രാമക്ഷേത്രവും സന്ദർശിച്ചുവെന്നും അവിടെ രാമഭഗവാനെ ദർശിച്ചതിന്​ ശേഷം ലഭിച്ച സംതൃപ്​തി എല്ലാവരും അനുഭവിക്കേണ്ടതാണെന്ന്​ താൻ ചിന്തിച്ചുവെന്നും കെജ്​രിവാൾ കൂട്ടിച്ചേർത്തു.

നിയമസഭ തെരഞ്ഞെടുപ്പ്​ അടു​ത്തതോടെ ഗോവയിലാണ്​ മിക്ക പാർട്ടികളുടെയും കണ്ണ്​. തൃണമൂൽ കോൺഗ്രസ്​ നേതാവും പശ്ചിമബംഗാൾ മുഖ്യമന്ത്രിയുമായ മമത ബാനർജി കഴിഞ്ഞദിവസങ്ങളിൽ ഗോവയിൽ തമ്പടിച്ചിരുന്നു. കോൺഗ്രസ്​ നേതാവ്​ രാഹുൽ ഗാന്ധിയും ഗോവയിലെത്തിയിരുന്നു.