രാജസ്​ഥാനിൽ പശുസംരക്ഷണത്തിന് മൂന്നുവർഷത്തിനിടെ ചെലവാക്കിയത്​ 1500 കോടി

ജയ്​പുർ: രാജസ്​ഥാനിൽ മൂന്നുവർഷത്തിനിടെ പശുസംരക്ഷണതിന്​ 1500കോടി ചെലവാക്കിയതായി ​സംസ്​ഥാന നഗര വികസനകാര്യ മന്ത്രി ശാന്തി ധരിവാൾ. സ്​റ്റാമ്പ്​ ഡ്യൂട്ടി, മദ്യവിൽപ്പനയിൽനിന്ന്​ ലഭിക്കുന്ന നികുതി വരുമാനം തുടങ്ങിയവയാണ്​ പശു സംരക്ഷണത്തിനായി നീക്കിവെച്ചതെന്നും മന്ത്രി പറഞ്ഞു.

നിയമസഭയിൽ ബി.ജെ.പി നേതാവ്​ ധരം നാരായണിന്‍റെ ചോദ്യത്തിന്​ മറുപടി പറയുകയായിരുന്നു മ​ന്ത്രി. സ്റ്റാമ്പ്​ ഡ്യൂട്ടി വരുമാനമായി സംസ്​ഥാനത്തിന്​ 2015-16 മുതൽ 2020-21 വരെ 1242.56 കോടി ലഭിച്ചു. മദ്യവിൽപ്പനയിലൂടെ 1017.08 കോടി നികുതി വരുമാനം ലഭിച്ചുവെന്നും മന്ത്രി പറഞ്ഞു.

2259.64 കോടിയാണ്​ മൊത്തം വരുമാനം. പശുതൊഴുത്ത്​ നിർമിക്കാൻ 1500.46 കോടി, പശുതൊഴുത്ത്​ നവീകരണത്തിനായി 3.44 കോടി, ബയോഗ്യാസ്​ പദ്ധതിക്കായി 20 ലക്ഷം, നന്ദിശാല പദ്ധതിക്കായി 7.20 കോടി എന്നിവ ചെലവാക്കിയതായും മന്ത്രി പറഞ്ഞു.