'കാർഷിക നിയമങ്ങൾ പിൻവലിക്കുകയെന്നത്​​ തന്‍റെ അവസാന ആഗ്രഹം'; പ്രക്ഷോഭത്തിനിടെ വീണ്ടും കർഷക ആത്മഹത്യ

ന്യൂഡൽഹി: ഡൽഹിയിൽ കർഷക പ്രക്ഷോഭം തുടരുന്ന ടിക്​രി അതിർത്തിയിൽ വീണ്ടും കർഷക ആത്മഹത്യ. ഹരിയാന സ്വദേശിയായ 55കാരനാണ്​ ഞായറാഴ്ച രാവിലെ ആത്മഹത്യ ചെയ്​തത്​.

ഹിസാർ ജില്ലക്കാരനായ രജ്​ബീറിനെ പ്രക്ഷോഭ ഭൂമിയിൽനിന്ന്​ ഏഴുകിലോമീറ്റർ അകലെ തൂങ്ങിമരിച്ച നിലയിൽ കണ്ടെത്തുകയായിരുന്നു. കേന്ദ്രസർക്കാറിന്‍റെ കാർഷിക നിയമങ്ങൾക്കെതിരെ മൂന്ന്​ മാസമായി തുടരുന്ന പ്രക്ഷോഭത്തിൽ പ​െങ്കടുത്തിരുന്ന വ്യക്തിയാണ്​ ഇദ്ദേഹം.

മൃതദേഹത്തിൽനിന്ന്​ ആത്മഹത്യക്കുറിപ്പും കണ്ടെടുത്തു. കാർഷിക നിയമങ്ങളിൽ ​പ്രതിഷേധിച്ചാണ്​ താൻ ജീവൻ കളയുന്നതെന്ന്​ രജ്​ബീർ ആത്മഹത്യ കുറിപ്പിൽ പറയുന്നു. തന്‍റെ അവസാന ആഗ്രഹമായി കണക്കാക്കി കേന്ദ്രം കാർഷിക നിയമങ്ങൾ പിൻവലിക്കണമെന്നും അദ്ദേഹം പറയുന്നു.

കാർഷിക നിയമങ്ങളിൽ പ്രതിഷേധിച്ച്​ ആയിരക്കണക്കിന്​ കർഷകരാണ്​ മാസങ്ങളായി ഡൽഹി അതിർത്തിയിൽ തമ്പടിച്ച്​ പ്രതിഷേധിക്കുന്നത്​. പ്രക്ഷോഭത്തിൽ പ​ങ്കെടുത്ത നിരവധി കർഷകർ കേന്ദ്രത്തിന്‍റെ നയങ്ങളിൽ മനംനൊന്ത്​ ആത്മഹത്യ ചെയ്യുകയും ചെയ്​തിരുന്നു.