ത്രിപുരയിൽ പത്ര സ്​ഥാപനത്തിന്​ നേരെ​ ബി.ജെ.പി ആക്രമണം; നാല്​ മാധ്യമപ്രവർത്തകർക്ക്​ പരിക്ക്​

ഗുവാഹത്തി: ത്രിപുരയിൽ അരങ്ങേറുന്ന അക്രമ സംഭവങ്ങൾക്ക്​ പിന്നാലെ 'പ്രതിബാദി കലാം' ദിനപത്രത്തിന്‍റെ ഓഫിസിനും നേരെയും അക്രമം. നാല്​ മാധ്യമപ്രവർത്തകർക്ക്​ പരിക്കേറ്റു. ബി.ജെ.പി നേതാക്കളുടെയും പ്രവർത്തകരുടെയും നേതൃത്വത്തിലാണ്​ ആക്രമണമെന്നാണ്​ പരാതി.

സംസ്​ഥാനത്ത്​ തുടരുന്ന ബി.ജെ.പി -സി.പി.എം സംഘർഷത്തിന്​ പിന്നാലെയാണ്​ ബുധനാഴ്ച വൻ അക്രമ സംഭവങ്ങൾക്ക്​ ത്രിപുര സാക്ഷ്യം വഹിച്ചത്​. നിരവധി കെട്ടിടങ്ങളും വാഹനങ്ങളും തീയിട്ട്​ നശിപ്പിച്ചിരുന്നു.

പ്രതിബാധി കലാമിന്‍റെ ഓഫി​സിലെ രേഖകളും ഉപകരണങ്ങളും നശിപ്പിക്കുകയും ബൈക്കുകളും കാറുകളും അഗ്​നിക്കിരയാക്കുകയും ചെയ്​തതായി പ്രതിബാധി കലാം എഡിറ്ററും പബ്ലിഷറുമായ അനൽ റോയ്​ ചൗധരി നൽകിയ പരാതിയിൽ പറയുന്നു.

'നാലോളം മാധ്യമപ്രവർത്തകർക്ക്​ പരിക്കേറ്റു. എല്ലാ രേഖകളും കമ്പ്യൂട്ടറുകളും സി.സി.ടി.വി കാമറകളും നശിപ്പിച്ചു. അതേസമയം പൊലീസ്​ സംഘം നിശബ്​ദ കാഴ്​ചക്കാരായി നിന്ന​ു, ഒന്നും ചെയ്​തില്ല' -എഫ്​.ഐ.ആറിൽ പറയുന്നു.

ലാത്തിയും മുർച്ഛയുള്ള ആയുധവുമായാണ്​ ഗുണ്ടകൾ ഓഫിസിലെത്തിയത്​. ഞങ്ങളുടെ മാധ്യമപ്രവർത്തകനായ പ്രസൻജിത്​ സാഹക്ക്​ തലയുടെ പിറകിൽ മൂർച്ഛയുള്ള ആയുധംകൊണ്ട്​ മുറിവേറ്റു. പരിക്ക്​ ഗുരുതരമാണ്​ -ചൗധരി മാധ്യമങ്ങളോട്​ പറഞ്ഞു.

പത്രസ്​ഥാപനത്തിന്​ നേരെ നടന്ന അതിക്രമത്തിൽ ഉടൻ അന്വേഷണം നടത്തി നടപടി സ്വീകരിക്കണമെന്ന്​ മുതിർന്ന മാധ്യമപ്രവർത്തകർ ആവശ്യപ്പെട്ടു. 12 മണിക്കൂറിനകം പ്രതികളെ അറസ്റ്റ്​ ചെയ്​തില്ലെങ്കിൽ നീതിക്കായി വൻ പ്രക്ഷോഭം സംഘടിപ്പിക്കുമെന്ന്​ അഗർത്തല പ്രസ്​ ക്ലബ്​ സെക്രട്ടറി പ്രണബ്​ സർക്കാർ പറഞ്ഞു.

സംസ്​ഥാനത്ത്​ രണ്ടുദിവസമായി തുടരുന്ന ആക്രമത്തിനിടെ സി.പി.എം ഓഫിസുകൾക്ക്​ തീയിട്ടിരുന്നു. 'രണ്ടര വർഷ​ത്തിലേറെയായി പൂട്ടിയിട്ടിരുന്ന ഞങ്ങളുടെ ലോക്കൽ കമ്മിറ്റി ഓഫിസ്​ ആക്രമിക്കുകയും നശിപ്പിക്കുകയും ചെയ്​തു. ഞങ്ങളുടെ വാഹനങ്ങൾ തകർക്കുകയും തീയിട്ട്​ നശിപ്പിക്കുകയും ചെയ്​തു' -സി.പി.എമ്മിന്‍റെ ബിജാൻ ധർ പറഞ്ഞു. സംസ്​ഥാനത്ത്​ ബി.ജെ.പി നടത്തിയ റാലിക്ക്​ പിന്നാലെയായിരുന്നു അക്രമം.

കഴിഞ്ഞ ദിവസം വിവിധയിടങ്ങളിൽ സി.പി.എം, ബി.ജെ.പി പ്രവർത്തകർ ഏറ്റുമുട്ടിയിരുന്നു. മുൻ മുഖ്യമന്ത്രിയും പ്രതിപക്ഷ നേതാവുമായ മണിക്​ സർക്കാറിനെ സ്വന്തം മണ്ഡലമായ ധൻപൂരിൽ ബി.ജെ.പി പ്രവർത്തകർ തടഞ്ഞതോടെയാണ്​ സംഘർഷത്തിന്​ തുടക്കം. ധൻപൂരിലെ കതാലിയയിൽ ഒരു രാഷ്​ട്രീയ പരിപാടിയിൽ പ​ങ്കെടുക്കാനെത്തിയ അദ്ദേഹത്തിന്‍റെ വാഹനവ്യൂഹത്തെ ബി.ജെ.പി പ്രവർത്തകർ തടയുകയായിരുന്നു.

തുടർന്ന്​ സി.പി.എം പ്രവർത്തകർ പ്രദേശത്ത്​ സംഘടിക്കുകയും മണിക്​ സർക്കാറിന്​ സംരക്ഷണ കവചം ഒരുക്കുകയും ചെയ്​തു. ഇതോടെയാണ്​​ സംഘർഷം ഉടലെടുത്തത്​. സംഘർഷം വിവിധ മേഖലകളിലേക്ക് വ്യാപിക്കുകയായിരുന്നു.