യെദ്യൂരപ്പക്ക്​ കുരുക്ക്​? ​മകന്‍റെയും വിശ്വസ്തരുടെയും കേന്ദ്രങ്ങളിൽ ആദായ നികുതി റെയ്ഡ്; നേതൃത്വം നൽകുന്നത്​ 300 ഉദ്യോഗസ്ഥർ

ബംഗളൂരു: കർണാടക മുൻ മുഖ്യമന്ത്രിയും ബി.ജെ.പി നേതാവുമായ ബിഎസ് യെദ്യൂരപ്പയുടെ മകനും വിശ്വസ്തർക്കും പങ്കാളിത്തമുള്ള സ്​ഥാപനങ്ങളിൽ ആദായ നികുതി വകുപ്പ് റെയ്ഡ്. യെദ്യൂരപ്പയുടെ മകനും ബി.ജെ.പി വൈസ് പ്രസിഡന്‍റുമായ വിജയേന്ദ്രയുടെ സാമ്പത്തിക ഇടപാടുകളും അന്വേഷണ പരിധിയിലുണ്ട്.

യെദ്യൂരപ്പയുടെ മോദിവിരുദ്ധ പ്രസ്​താവനയും കർണാടക ബി.ജെ.പിയിലെ പടലപ്പലപ്പിണക്കങ്ങളും ചൂടുപിടിക്കുന്നതിനിടെയാണ്​ യെദിയൂരപ്പ വിഭാഗത്തെയും പാർട്ടിയെയും ഞെട്ടിച്ച്​ വ്യാഴാഴ്ച രാവിലെ മുതൽ റെയ്ഡ് ആരംഭിച്ചത്. വിവിധയിടങ്ങളിൽ ഒരേസമയമാണ്​ പരിശോധന. 300 ആദായ നികുതി വകുപ്പ് ഉദ്യോഗസ്ഥരാണ് വിവിധ കേന്ദ്രങ്ങളിലായി പരിശോധന നടത്തുന്നത്.

വിജയേന്ദ്രയുടെ സ്​ഥാപനങ്ങളെ കൂടാതെ പുറമെ യെദ്യൂരപ്പയുടെ പഴ്സണൽ അസിസ്റ്റന്‍റ്​ ഉമേഷിന്‍റെ സ്ഥാപനങ്ങളിലും റെയ്​ഡ്​ നടക്കുന്നുണ്ട്​. ഉമേഷിൻറെ രാജാജി നഗറിലെ വീട്ടിലും ബസന്ത് സർക്കിളിലെ സ്ഥാപനങ്ങളിലുമാണ്​ പരിശോധന. വിജയേന്ദ്രയ്ക്ക് പങ്കാളിത്തമുള്ള സ്പ്രേ സ്റ്റാർ റെസിഡൻസി, ആർ. എൻറർപ്രൈസസ് എന്നീ സ്ഥാപനങ്ങളിലും പരിശോധിക്കുന്നുണ്ട്​.

കർണാടകയിൽ വരാനിരിക്കുന്ന ഉപതെരഞ്ഞെടുപ്പുകളിൽ മോദിയുടെ രാഷ്ട്രീയ പ്രഭാവം ഗുണം ചെയ്യില്ലെന്ന്​ കഴിഞ്ഞ ദിവസം യെദ്യൂരപ്പ അഭിപ്രായപ്പെട്ടിരുന്നു. ഉപതെരഞ്ഞെടുപ്പുകളുടെ ചുമതല വിജയേന്ദ്രയ്ക്ക് നൽകാത്തതിനെ ചൊല്ലിയും കലഹം നിലനിൽക്കുന്നുണ്ട്​.