പെൺകുട്ടികളുടെ വിവാഹപ്രായം ഉയർത്തുന്നത് പുരുഷാധിപത്യത്തെ ശക്തിപ്പെടുത്തും -ഫ്ലാവിയ ആഗ്​നസ്​

പെൺകുട്ടികളുടെ വിവാഹപ്രായം 21 ആക്കി ഉയർത്തുന്നത്​ സംബന്ധിച്ച്​ രാജ്യത്ത്​ വലിയ ചർച്ചകൾ നടന്നുകൊണ്ടിരിക്കുകയാണ്​. വ്യത്യസ്​ത അഭിപ്രായങ്ങളാണ്​ ഇത്​ സംബന്ധിച്ച്​ ഉയർന്നുകേൾക്കുന്നത്​. വിഷയത്തിൽ വളരെ വിഭിന്നമായ അഭിപ്രായ പ്രകടനവുമായി പ്രമുഖ എഴുത്തുകാരിയും സ്​ത്രീ അവകാശ പ്രവർത്തകയുമായ ഫ്ലാവിയ ആഗ്​നസ് രംഗത്തെത്തി​. പെൺകുട്ടികളുടെ വിവാഹപ്രായം ഉയർത്തുന്നത് പുരുഷാധിപത്യത്തെ ശക്തിപ്പെടുത്താൻ മാത്രമേ ഉപകരിക്കൂ എന്ന്​ അവർ 'ടൈംസ്​ ഓഫ്​ ഇന്ത്യ'യിൽ എഴുതിയ ലേഖനത്തിൽ പറയുന്നു.

(ഫ്ലാവിയ ആഗ്​നസ്​)

സ്ത്രീശാക്തീകരണത്തിന്‍റെ അളവുകോലായി വിശേഷിപ്പിക്കപ്പെടുന്ന പെൺകുട്ടികളുടെ വിവാഹപ്രായം 18ൽ നിന്ന് 21 ആക്കാനുള്ള സർക്കാർ നീക്കത്തെ രാജ്യത്തുടനീളമുള്ള നിരവധി വനിതാ സംഘടനകൾ എതിർത്തുപോരുകയാണല്ലോ. 2020 ഓഗസ്റ്റ് 15ന് തന്‍റെ സ്വാതന്ത്ര്യദിന പ്രസംഗത്തിൽ വിവാഹപ്രായം ഉയർത്താനുള്ള സർക്കാരിന്‍റെ ഉദ്ദേശ്യം പ്രധാനമന്ത്രി പ്രഖ്യാപിച്ചിരുന്നു. കൂടാതെ ഒരു കമ്മിറ്റി രൂപീകരിച്ചിട്ടുണ്ടെന്നും സ്ഥിതിഗതികൾ പരിശോധിക്കാൻ ഒരു ടാസ്‌ക് ഫോഴ്‌സ് ഇതിനകം തന്നെ നിലവിൽ വരുമെന്നും കേന്ദ്രം അറിയിച്ചിരുന്നു. "പെൺമക്കളുടെയും സഹോദരിമാരുടെയും ആരോഗ്യത്തെക്കുറിച്ച് സർക്കാർ നിരന്തരം ശ്രദ്ധാലുവാണ്.

പെൺമക്കളെ പോഷകാഹാരക്കുറവിൽ നിന്ന് രക്ഷിക്കാൻ അവർ ശരിയായ പ്രായത്തിൽ വിവാഹിതരാകേണ്ടത് ആവശ്യമാണ്" -പ്രധാനമന്ത്രി പ്രസംഗത്തിൽ കൂട്ടിച്ചേർത്തു. സർക്കാർ പറയുന്നതനുസരിച്ച്, ഈ നീക്കം പെൺകുട്ടികളെയും യുവതികളെയും ശാക്തീകരിക്കുകയും അവരുടെ വിദ്യാഭ്യാസത്തിലേക്കുള്ള പ്രവേശനം വർദ്ധിപ്പിക്കുകയും ശിശുമരണ നിരക്ക്, മാതൃമരണ അനുപാതം എന്നിവ കുറക്കുകയും ചെയ്യും. 2020 സെപതംബറിൽ സംസ്ഥാന സർക്കാരിന് ഒരു മെമ്മോറാണ്ടം സമർപ്പിച്ചുകൊണ്ട് ഗുജറാത്തിലെ നിരവധി വനിതാ സംഘടനകൾ ഈ നീക്കത്തെ എതിർത്തിരുന്നു. 'സ്ത്രീ ശാക്തീകരണത്തിനായി നിർമ്മിക്കുന്ന ഒരു നിയമ ചട്ടക്കൂടിനെക്കുറിച്ച് ചിന്തിക്കുമ്പോൾ വിവാഹമോ വിവാഹപ്രായമോ അതിന്‍റെ പ്രാഥമിക ശ്രദ്ധയാകരുത്. ഇത് മാറ്റത്തിന്‍റെ വ്യാപ്തിയെ നാടകീയമായി ചുരുക്കുന്നു' -ഇതായിരുന്നു മൊമ്മോറാണ്ടത്തിന്‍റെ രത്​നച്ചുരുക്കം.

അടിസ്​ഥാന കാര്യത്തിലേക്ക്​ മടങ്ങിയാൽ ഒരു കാര്യം മനസിലാകും. നിയമം ഒരു പരിഹാരമല്ല. വിവാഹപ്രായം 16ൽ നിന്ന് 18 ആക്കി 40 വർഷത്തിനു ശേഷവും, എല്ലാ വിവാഹങ്ങളുടെയും 23 ശതമാനം ശൈശവ വിവാഹങ്ങളാണ്.

അതുപോലെ, 96 സിവിൽ സൊസൈറ്റി ഓർഗനൈസേഷനുകൾ ഉൾപ്പെടുന്ന ടാസ്‌ക് ഫോഴ്‌സിന് മറുപടിയായി രൂപീകരിച്ച 'യംഗ് വോയ്‌സ്: നാഷനൽ വർക്കിംഗ് ഗ്രൂപ്പ്' 2020 ജൂലൈ 25ന് പ്രസിദ്ധീകരിച്ച റിപ്പോർട്ടിലും ഈ നീക്കത്തെ എതിർത്തിരുന്നു. 15 സംസ്ഥാനങ്ങളിലായി ഏകദേശം 2,500 കൗമാരക്കാരിൽ നടത്തിയ സർവേക്ക്​ ശേഷം പുറത്തു വന്ന റിപ്പോർട്ട് ഇങ്ങനെ പറയുന്നു. 'സ്ത്രീകളുടെ ശാക്തീകരണത്തിന്‍റെ മൂലകാരണങ്ങൾ പരിഹരിക്കപ്പെടാത്തിടത്തോളം വിവാഹപ്രായം വർധിക്കുന്നത് ഒന്നുകിൽ ദോഷം ചെയ്യും അല്ലെങ്കിൽ അത് ഗുണം ചെയ്യില്ല'.

സിവിൽ സൊസൈറ്റി ഓർഗനൈസേഷനുകൾ ചൂണ്ടിക്കാണിച്ചതുപോലെ, പുരുഷാധിപത്യത്തിൽ ആഴത്തിൽ വേരൂന്നിയ ഒരു സമൂഹത്തിനുള്ളിൽ ഈ നിയമം വികസിക്കുമെന്നും പെൺകുട്ടികളുടെ സ്വയംഭരണാധികാരം നിയന്ത്രിക്കാനും അവരുടെ ലൈംഗികതയെ കുറ്റവൽകരിക്കാനും പിഴ ചുമത്താനും ഇത് പ്രാഥമികമായി മാതാപിതാക്കൾ ഉപയോഗിക്കുമെന്ന വസ്തുത നമുക്ക് കാണാതിരിക്കാനാവില്ല. തിരഞ്ഞെടുപ്പുകൾ, പൊലീസ്, വെൽഫെയർ ഓഫീസർമാർ തുടങ്ങിയവരുടെ സജീവമായ ഒത്തുകളിക്കും ഇത്​ വഴിയൊരുക്കും. 18ഓ 19ഓ വയസ്സിൽ വിവാഹിതയായ ഒരു പെൺകുട്ടി വിവാഹപ്രശ്‌നങ്ങൾ നേരിടുകയും പരിഹാരത്തിനായി കോടതിയെ സമീപിക്കുകയും ചെയ്‌താൽ, വിവാഹം സാധുവല്ലെന്നും അവൾക്ക് അവകാശങ്ങളില്ലെന്നും ഭർത്താവ് വാദിച്ചേക്കാമെന്നും ആശങ്കയുണ്ട്. ഇത് കടുത്ത ആശങ്കക്ക്​ കാരണമാണ്. ഇത് പരിഹരിക്കുന്നതിന്, പ്രായപൂർത്തിയാകാത്ത വിവാഹത്തിൽ ഒരു സ്ത്രീ വിധവയായാൽ അവളുടെ വൈവാഹിക അവകാശങ്ങളോ അനന്തരാവകാശമോ നഷ്ടപ്പെടില്ലെന്ന് നിയമത്തിനുള്ളിൽ വ്യക്തമായ നിർദ്ദേശം ഉണ്ടായിരിക്കേണ്ടത് ആവശ്യമാണ്. സ്ത്രീകളുടെ വിദ്യാഭ്യാസത്തിന് മികച്ച അവസരങ്ങൾ നൽകുന്നതിനും അവരുടെ ആരോഗ്യം മെച്ചപ്പെടുത്തുന്നതിനുമായി 1978 ൽ വിവാഹപ്രായം 16ൽ നിന്ന് 18 ആയി ഉയർത്തി.

എന്നിരുന്നാലും, ഏറ്റവും പുതിയ നാഷനൽ ഫാമിലി ഹെൽത്ത് സർവേ 40 വർഷങ്ങൾക്ക് ശേഷവും ശൈശവ വിവാഹങ്ങളുടെ ഭയാനകമായ നിരക്ക് കാട്ടിത്തരുന്നു. ഇന്ത്യയിലെ ശൈശവ വിവാഹക്കണക്ക്​ 23 ശതമാനം ആണ് എന്ന ദയനീയ വസ്തുത പുറത്തുവന്നിരിക്കുന്നു. പിന്നാക്ക, ദാരിദ്ര്യ ബാധിത പ്രദേശങ്ങളിലെ പെൺകുട്ടികൾക്ക് അവസരമൊരുക്കുന്നതിനോ മെച്ചപ്പെട്ട ആരോഗ്യ സംരക്ഷണം ലഭ്യമാക്കുന്നതിനോ സർക്കാരിന്‍റെ പരാജയത്തിലേക്കാണ് ഇത് വിരൽ ചൂണ്ടുന്നത്. സ്ത്രീകളോടുള്ള യാഥാസ്ഥിതികവും സ്ത്രീവിരുദ്ധവുമായ മനോഭാവവും ഇത് മാറ്റിയിട്ടില്ല. അങ്ങനെയെങ്കിൽ, വിവാഹപ്രായം 18ൽ നിന്ന് 21 ആക്കുന്നതിലൂടെ സ്ത്രീശാക്തീകരണം സാധ്യമാകുമെന്ന് സർക്കാർ അവകാശപ്പെടുന്നത് എന്തടിസ്ഥാനത്തിലാണ്? നേരെമറിച്ച്, വാസ്തവത്തിൽ, ഇത് പ്രായപൂർത്തിയാകാത്ത വിവാഹങ്ങളുടെ എണ്ണം ക്രമാതീതമായി വർദ്ധിപ്പിക്കുകയും കൂടുതൽ യുവാക്കളെ ക്രിമിനൽ കുറ്റത്തിന് വിധേയരാക്കുകയും ചെയ്യും. പെൺകുട്ടികളുടെ സ്‌കൂളുകളിലേക്കും കോളജുകളിലേക്കും ഉള്ള പ്രവേശനം വർധിപ്പിക്കാൻ ടാസ്‌ക് ഫോഴ്‌സ് തന്നെ സർക്കാരിനോട് ആവശ്യപ്പെട്ടിരുന്നു. അവ നടപ്പാക്കിയില്ലെങ്കിൽ നിയമം ഫലപ്രദമാകില്ല. പെൺകുട്ടികളുടെ വിവാഹപ്രായം വർധിപ്പിക്കുന്നതിനുള്ള മുൻകരുതലുകളായിരിക്കണം ഈ നടപടികളെന്ന് ടാസ്‌ക് ഫോഴ്‌സിന്റെ റിപ്പോർട്ട് സൂചിപ്പിക്കുന്നു.

ദാരിദ്ര്യമനുഭവിക്കുന്ന സമൂഹങ്ങളിൽ നിന്നുള്ള ധാരാളം പെൺകുട്ടികൾ സ്‌കൂൾ വിട്ടുപോകുന്നവരായി മാറുന്നു. കൂടാതെ, ഇതുവരെ സ്കൂളിൽ പോയിട്ടില്ലാത്ത ഒരു വലിയ വിഭാഗം പെൺകുട്ടികളുണ്ട്. ദാരിദ്ര്യം ഇവിടെ ഒരു പ്രധാന ഘടകമാണ്. ലോക്ക്ഡൗൺ സ്ഥിതി കൂടുതൽ വഷളാക്കിയി​േട്ടയുള്ളൂ. ഓരോ കുട്ടിക്കും അടിസ്ഥാന വിദ്യാഭ്യാസം ലഭിക്കുന്നുണ്ടെന്ന് ഉറപ്പാക്കാൻ കേന്ദ്രീകൃത പരിപാടികളും ആവശ്യമായ ബജറ്റ് വിഹിതവും ആവശ്യമാണ്. ഒരു പെൺകുട്ടി സ്കൂളിൽ പഠിക്കുമ്പോൾ മാത്രമേ പ്രായപൂർത്തിയാകാത്ത വിവാഹങ്ങൾ കുറയുകയുള്ളൂ. അവർ ലേഖനത്തിൽ ചൂണ്ടിക്കാട്ടുന്നു.