ഇന്ത്യയിൽ മുസ്​ലിംകൾക്കും ക്രിസ്​ത്യാനികൾക്കും ദലിതർക്കുമെതിരെ നിരന്തര ആക്രമണം -​ സൗത്ത്​ ഏഷ്യൻ മൈനോരിറ്റി റിപ്പോർട്ട്​

ഇന്ത്യയിൽ മുസ്​ലിംകൾക്കും ക്രിസ്​ത്യാനികൾക്കും ദലിതർക്കുമെതിരെ ആക്രമണങ്ങൾ വർധിച്ചതായി സൗത്ത്​ ഏഷ്യൻ മൈനോരിറ്റി റിപ്പോർട്ട്​. പൗരത്വ ഭേദഗതി നിയമം നിലവിൽ വന്നതിന്​ പിന്നാലെ ഇന്ത്യ മുസ്​ലിംകൾക്ക്​ അപകടമായ പ്രദേശമായെന്നും റിപ്പോർട്ടിൽ പറയുന്നു.

അഫ്​ഗാനിസ്​താൻ, ബംഗ്ലദേശ്​, ഭൂട്ടാൻ, ഇന്ത്യ, നേപ്പാൾ, പാകിസ്​താൻ, ശ്രീലങ്ക അടക്കമുള്ള രാജ്യങ്ങളിലെ ന്യൂനപക്ഷങ്ങളുടെ അവകാശത്തിനും പൗര സ്വാതന്ത്രത്തിനും​ വേണ്ടി നിലകൊള്ളുന്ന എൻ.ജി.ഒ സംഘടനയുടേതാണ്​ റിപ്പോർട്ട്​

2019 ഡിസംബറിൽ സി.എ.എ നിലവിൽ വന്നത്​ മുസ്​ലിംകളുടെ ജീവിതം ദുഷ്​കരമാക്കി. 2014ൽ ദേശീയ തലത്തിൽ ബി.ജെ.പി അധികാരമേറ്റത് മതന്യൂനപക്ഷങ്ങൾക്കും അവശ വിഭാഗങ്ങൾക്കുമെതിരെ ആക്രമണം വർധിപ്പിച്ചു. മുസ്​ലിംകൾ ക്രിസ്​ത്യാനികൾ ​ദളിതർ അടക്കമുള്ളവർക്കെതിരെ ആൾകൂട്ട ആക്രമണങ്ങൾ വർധിച്ചു.

വർധിച്ച ഭൂരിപക്ഷത്തോടെയുള്ള ബി.ജെ.പിയുടെ അധികാരത്തിലേക്കുള്ള മടങ്ങി വരവ്​ കാര്യങ്ങൾ സങ്കീർണമാക്കിയതായും പശുസംരക്ഷണമെന്ന പേരിലുള്ള നിയമങ്ങൾ മുസ്​ലിംകളെയും ദലിതരെയും പാർശ്വവൽക്കരിക്കുന്നെന്നും റിപ്പോർട്ടിലുണ്ട്​. മനുഷ്യാവകാശ പ്രവർത്തകർ, മാധ്യമപ്രവർത്തകർ, അക്കാദമിക്​ വിദഗ്​ധർ, പ്രതിഷേധക്കാർ എന്നിവർക്കെതിരെ ആക്രമണങ്ങൾ വർധിച്ചതായും റിപ്പോർട്ടിൽ പരാമർശമുണ്ട്​്​.