ഇന്ത്യ സ്വർഗമാണ്​, ന്യൂനപക്ഷങ്ങൾക്ക്​ പാകിസ്​താൻ നരകം -നഖ്​വി

ന്യൂഡൽഹി: രാജ്യവ്യാപക പ്രതിഷേധങ്ങൾ നടക്കുന്ന സാഹചര്യത്തിലും പൗരത്വ ഭേദഗതി നിയമത്തെ ന്യായീകരിച്ച്​ കേന്ദ്ര ന്യൂനപക്ഷ വകുപ്പ്​ മന്ത്രി മുക്താർ അബ്ബാസ്​ നഖ്​വി. ഇന്ത്യ ഒരു സ്വർഗമാണ്​. എന്നാൽ ന്യൂനപക്ഷ വിഭാഗങ്ങൾക്ക്​ പാകിസ്​താൻ നരകമാണെന്നും നഖ്​വി പറഞ്ഞു. അയൽരാജ്യങ്ങളിലെ ന്യൂനപക്ഷ വിഭാഗങ്ങൾ നിർബന്ധിത മതപരിവർത്തനം ഉൾപ്പെടെ നിരവധി പ്രശ്​നങ്ങളാണ്​ നേരിടുന്നതെന്നും നഖ്​വി പറഞ്ഞു. അന്താരാഷ്​ട്ര ന്യൂനപക്ഷ അവകാശ ദിനാചരണ പരിപാടിയിൽ സംസാരിക്കുകയായിരുന്നു നഖ്​വി.

രാജ്യത്ത്​ വിദ്വേഷപരവും വിഷലിപ്​തവുമായ അന്തരീഷമുണ്ടാക്കാനുള്ള ഗൂഢാലോചന നടന്നിട്ടുണ്ട്​. പൗരത്വ ഭേദഗതി നിയമം പാസാക്കിയ ശേഷം വളരെ അപകടകരമായ മാനസികാവസ്ഥയിലേക്ക്​ സാമൂഹിക സാഹചര്യത്തെ മാറ്റാൻ ചിലർ ശ്രമിച്ചു​. സാമൂഹിക തലത്തി​ൽ രാജ്യത്തെ ഭിന്നിപ്പിക്കാനും ശ്രമം നടന്നു. ഇന്ത്യയിൽ മുസ്​ലിംകൾക്ക്​ ജീവിക്കാൻ കഴിയി​െല്ലന്ന്​ പ്രചരിപ്പിക്കുന്നു. എന്നാൽ അത്​ തെറ്റാണ്​. നിലവിലുള്ള വിഷലിപ്​തമായ സാഹചര്യം വ്യാജവും കെട്ടിച്ചമച്ചുണ്ടാക്കിയതുമാണ്​- നഖ്​വി കൂട്ടിച്ചേർത്തു.

വർഷങ്ങളായി ഇന്ത്യയിൽ കഴിഞ്ഞുവരുന്ന മുസ്​ലിംകള പൗരത്വ ഭേദഗതി നിയമം ബാധിക്കില്ല. ഇന്ത്യയിലെ മുസ്​ലിംകൾ സുരക്ഷിതരാണ്​. അവരെ സംരക്ഷിക്കും. നിയമത്തെ കുറിച്ച്​ ബോധവത്​കരണം നടത്തുക എന്നത്​ സർക്കാറി​​​​െൻറ ഉത്തരവാദിത്വമാണ്​. കൂടാതെ രാജ്യത്തെ സമാധാന അന്തരീക്ഷം തകർക്കാനുള്ള ഗൂഢാലോചനക്കെതിരെ പോരാടുമെന്നും മുക്താർ അബ്ബാസ്​ നഖ്​വി പറഞ്ഞു.

ജാമിഅ മില്ലിയ സർവകലാശാലയിലെ വിദ്യാർഥികൾക്കെതിരെയുള്ള പൊലീസ്​ നടപടി അന്വേഷിക്കുമെന്ന്​ കഴിഞ്ഞ ദിവസം നഖ്​വി അറിയിച്ചിരുന്നു. വിദ്യാർഥികൾ അരാജകവാദികളാണെന്ന്​ പറയുന്നില്ല. എന്നാൽ അവർ തെറ്റിദ്ധരിക്ക​പ്പെട്ടിരിക്കുന്നു. ​വിവരങ്ങൾ തെറ്റായി മനസിലാക്കി പ്രതിഷേധിക്കുന്ന രീതി ശരിയല്ല എന്നായിരുന്നു നഖ്​വിയുടെ പ്രസ്​താവന.