ഇന്ത്യയുടെ വികസനത്തിന്​ ധീരമായ തീരുമാനങ്ങൾ ആവശ്യം​– ജെയ്​റ്റ്​ലി

ഗാന്ധിനഗർ: ഇന്ത്യയുടെ വികസനത്തിനായി ധീരമായ തീരുമാനങ്ങൾ ആവശ്യമാണെന്ന്​ ധനമന്ത്രി അരുൺ ജെയ്​റ്റ്​ലി. വൈബ്രൻറ്​ ഗുജറാത്ത്​ സമ്മേളനത്തിൽ സംസാരിക്കുകയായിരുന്നു അദ്ദേഹം. നോട്ട്​ പിൻവലിക്കൽ തീരുമാനത്തെ ചരിത്രപരമായ തീരുമാനമെന്നാണ്​ ജെയ്​റ്റ്​ലി വിശേഷിപ്പിച്ചത്​. നോട്ട്​ പിൻവലിക്കൽ നമ്മുടെ ഇപ്പോഴത്തെ ജീവതത്തെ മാത്രമല്ല ഭാവി ജീവിതത്തെയും ഗുണകരമായി ബാധിക്കും. നല്ല തീരുമാനങ്ങൾ നടപ്പിലാക്കു​േമ്പാൾ ആദ്യം ചില ബുദ്ധിമുട്ടുകൾ ഉണ്ടാകുന്നത്​ സ്വാഭാവികമാണെന്നും ജെയ്​റ്റ്​ലി പറഞ്ഞു.

ഉൽപ്പന്ന സേവന നികുതിയുമായി ബന്ധപ്പെട്ട  ​പ്രധാന തർക്കങ്ങൾ പരിഹരിച്ച്​ കഴിഞ്ഞു. ഇനി ചില പ്രശ്​നങ്ങൾ കൂടി പരിഹരിക്കാനുണ്ട്​. അത്​ വൈകാതെ തന്നെ പരിഹരിക്കപ്പെടുമെന്നാണ്​ പ്രതീക്ഷ. നോട്ട്​ പിൻവലിക്കൽ തീരുമാനവും  ഉൽപ്പന്ന സേവന നികുതിയും ഇൗ വർഷം രാജ്യത്തി​​െൻറ സമ്പദ്​വ്യവസ്​ഥക്ക്​ കരുത്ത്​ പകരുമെന്നും ജെയ്​റ്റ്​ലി പറഞ്ഞു.
 
നവംബർ എട്ടാം തിയതിയാണ്​ 500, 1000 രൂപയുടെ നോട്ടുകൾ സർക്കാർ പിൻവലിച്ചത്​. കള്ളപണവും കളളനോട്ടും തടയുന്നതിന്​ വേണ്ടിയായിരുന്നു സർക്കാർ നടപടി. എന്നാൽ നടപടി മൂലം രാജ്യത്ത്​ വൻതോതിൽ കറൻസി ക്ഷാമമുണ്ടാവുകയും അത്​ വൻ പ്രതിഷേധത്തിന്​ വഴിവെക്കുകയും ചെയ്​തിരുന്നു