അതിർത്തിയിലെ ചൈനീസ്​ കൈയേറ്റത്തെ തള്ളി ഇന്ത്യ; യു.എസ്​ റിപ്പോർട്ട്​ ഗൗരവതരം

ന്യൂഡൽഹി: അരുണാചൽ പ്രദേശ്​ അതിർത്തിയിലെ തർക്ക പ്രദേശത്ത്​ ചൈന വൻ ഗ്രാമം നിർമിച്ചതായ യു.എസ്​ റിപ്പോർട്ടിനെ തള്ളി ഇന്ത്യ. ചൈനീസ്​ കൈയേറ്റമോ ​ അവകാശവാദങ്ങളോ ഇന്ത്യ അംഗീകരിച്ചിട്ടില്ലെന്ന്​ വിദേശകാര്യമന്ത്രാലയ വക്​താവ്​ അരിന്ദം ബാഗ്​ചി പറഞ്ഞു. സുരക്ഷയുമായി ബന്ധപ്പെട്ട നടപടികൾ ഇന്ത്യ നിരന്തരം നിരീക്ഷിക്കുകയാണെന്നും പരമാധികാരവും അഖണ്ഡതയും സംരക്ഷിക്കാൻ ആവശ്യമായ നടപടികളെല്ലാം കൈക്കൊണ്ടതായും അദ്ദേഹം വ്യക്​തമാക്കി.

ചൈനീസ്​ അതിർത്തികളിൽ റോഡുകളും പാലങ്ങളുമടക്കമുള്ള അടിസ്​ഥാനസൗകര്യ വികസന നടപടികൾ വേഗത്തിലാക്കിയിട്ടുണ്ട്​. ഇന്ത്യ-ചൈന അതിർത്തിയിൽ ചൈന വൻഗ്രാമങ്ങൾ നിർമിച്ചതായി യു.എസ്​ പ്രതിരോധ വകുപ്പ്​ യു.എസ്​ കോൺഗ്രസിന്​ സമർപ്പിച്ച റിപ്പോർട്ട്​ ഗൗരവത്തോടെയാണ്​ ഇന്ത്യ കാണുന്നതെന്നും അദ്ദേഹം പറഞ്ഞു. ദശകങ്ങളായി കൈയേറിയ പ്രദേശങ്ങളിലും അതിർത്തിയിലും വർഷങ്ങളായി ചൈന നിർമാണങ്ങൾ തുടരുകയാണെന്നും അദ്ദേഹം പറഞ്ഞു.

മാക്​മഹൻ രേഖക്ക്​ തെക്ക്​ ഇന്ത്യൻ അതിർത്തിക്കുള്ളിൽ സരി ചു നദീതീരത്താണ്​ ചൈനീസ്​ ഗ്രാമമെന്ന്​ യു.എസ്​ റിപ്പോർട്ടിൽ പറയുന്നു. അരുണാചൽ പ്രദേശിലെ അപ്പർ സബ്സ​ൻസിരി ജില്ലയിലാണിത്​. 1962ലെ യുദ്ധത്തിനു മുമ്പു പോലും ഇന്ത്യയുടെയും ചൈനയുടെയും സൈനികർ തമ്മിൽ ഏറ്റുമുട്ടൽ നടന്ന മേഖലയാണിത്​.

ഒരു പതിറ്റാണ്ടിലേറെയായി ഈ മേഖലയിൽ ചെറിയൊരു സൈനിക കാവൽകേന്ദ്രം ചൈനക്കുണ്ട്​. 2020ൽ പൂർണമായൊരു ഗ്രാമം തന്നെ ഇവിടെ ഉയർത്തുകയും ഇന്ത്യൻ ഭൂപ്രദേശത്ത്​ റോഡ്​ നിർമാണം വേഗത്തിലാക്കുകയും ചെയ്​തു -റിപ്പോർട്ടിൽ പറയുന്നു. അമേരിക്കൻ പ്രതിരോധ വിഭാഗമായ പെൻറഗണാണ്​ റിപ്പോർട്ട്​ പുറത്തുവിട്ടത്​.