പ്രതിദിന കോവിഡ്​ ബാധിതരുടെ എണ്ണം രണ്ടേമുക്കാൽ ലക്ഷത്തിലേക്ക്; 24 മണിക്കൂറിനിടെ 1,619 മരണം

ന്യൂഡൽഹി: രാജ്യത്ത്​ പ്രതിദിന കോവിഡ്​ കേസുകളുടെ എണ്ണം രണ്ടേമുക്കാൽ ലക്ഷത്തിലേക്ക് കടക്കുന്നു. 24 മണിക്കൂറിനിടെ 2,73,810 പേർക്കാണ്​ രോഗബാധ പുതുതായി സ്​ഥിരീകരിച്ചത്​. പ്രതിദിനം റിപ്പോർട്ട്​ ചെയ്യുന്ന ഏറ്റവും ഉയർന്ന വൈറസ് ബാധയാണിത്. തുടർച്ചയായി അഞ്ചാം ദിവസമാണ് പ്രതിദിന​ രോഗബാധിതരുടെ എണ്ണം രണ്ടു ലക്ഷം കടക്കുന്നത്​.

രണ്ടാം ദിവസമാണ് പ്രതിദിന​ രോഗബാധിതരുടെ എണ്ണം രണ്ടര ലക്ഷം കടക്കുന്നത്. ഇന്നലെ 2,61,500 പേർക്കാണ് രോഗബാധ സ്ഥിരീകരിച്ചത്.

24 മണിക്കൂറിനിടെ 1,619 പേരാണ്​ കോവിഡ്​ ബാധിച്ച്​ മരിച്ചത്​. 1,78,769 പേർ​ രാജ്യത്ത്​ ഇതുവരെ കോവിഡ്​ ബാധിച്ച്​ മരണത്തിന്​ കീഴടങ്ങി​.

രാജ്യത്ത്​ കോവിഡ്​ ബാധിച്ചവരുടെ ആകെ എണ്ണം 1.5 കോടി ആയി ഉയർന്നു. 19,29,329 പേരാണ്​ നിലവിൽ ചികിത്സയിലുള്ളത്​. 1,29,53,821 പേർ ഇതുവരെ രോഗമുക്തരായിട്ടുണ്ട്​. രാജ്യത്ത്​ ഇതുവരെ 12,38,52,566 പേരെ വാക്​സിനേഷന്​ വിധേയമാക്കി.

ഏപ്രിൽ 18 വരെ 26,78,94,549 സാംപിളുകൾ പരിശോധന നടത്തി. ഇതിൽ ഞായറാഴ്ച മാത്രം 13,56,133 സാംപിളുകൾ പരിശോധന നടത്തിയതായും ഇന്ത്യൻ കൗൺസിൽ ഒാഫ് മെഡിക്കൽ റിസർച്ച് (ഐ.സി.എം.ആർ) അറിയിച്ചു.