വിഷാദ രോഗവും പട്ടിണിയും കാരണം തെരുവിൽ; ഇന്ത്യൻ വിദ്യാർഥിനിക്ക്​ സഹായവുമായി അമേരിക്കയിലെ ഇന്ത്യൻ കോൺസുലേറ്റ്​

വിഷാദരോഗവും പട്ടിണിയും കാരണം ദുരിതത്തിലായ വിദ്യാർഥിനിക്ക്​ സഹായവുമായി അമേരിക്കയിലെ ഇന്ത്യൻ കോൺസുലേറ്റ്​. ഹൈദരാബാദ്​ സ്വദേശിനിയായ വിദ്യാർഥിനിയാണ്​ ചിക്കാഗോയിൽ ദുരിതത്തിൽ അകപ്പെട്ടത്​. കുട്ടിയുടെ മാതാവ്​ വിദേശകാര്യ മന്ത്രി ജയശങ്കറിന്​ ഇതുസംബന്ധിച്ച്​ കത്തെഴുതിയിരുന്നു.

തെലങ്കാന സ്വദേശിയായ സയ്യിദ ലുലു മിൻഹാജ് സെയ്ദിയെയാണ് ചിക്കാഗോയിലെ തെരുവിൽ പട്ടിണിയുടെ വക്കിൽ കണ്ടെത്തിയത്​. ചിക്കാഗോയിലെ കോൺസുലേറ്റ് ജനറൽ ഓഫ് ഇന്ത്യ വിദ്യാർഥിനിയുമായി ബന്ധപ്പെട്ടിട്ടുണ്ട്​. കുട്ടിക്ക്​ വൈദ്യസഹായവും ഇന്ത്യയിലേക്കുള്ള യാത്രയും ഉൾപ്പെടെ കോൺസുലേറ്റ്​ വാഗ്ദാനം ചെയ്തിട്ടുണ്ട്​.

‘ഞങ്ങൾക്ക് സയ്യിദ സെയ്ദിയുമായി ബന്ധപ്പെടാനായി. വൈദ്യസഹായവും ഇന്ത്യയിലേക്കുള്ള യാത്രയും ഉൾപ്പെടെയുള്ള സഹായം അവർക്ക്​ വാഗ്ദാനം ചെയ്തിട്ടുണ്ട്​. അവർ ആരോഗ്യവതിയാണ്. അമ്മയോട് സംസാരിച്ചു’- ചിക്കാഗോയിലെ കോൺസുലേറ്റ് ജനറൽ ഓഫ് ഇന്ത്യ ട്വീറ്റ്​ ചെയ്തു.

2021 ഓഗസ്റ്റിൽ ഡിട്രോയിറ്റിലെ ട്രൈൻ യൂനിവേഴ്‌സിറ്റിയിൽ നിന്ന് എം.എസ് പഠിക്കാനാണ് മകൾ യു.എസിലേക്ക് പോയതെന്ന് സയ്യിദയുടെ മാതാവ്​ പറഞ്ഞു. ‘രണ്ട് മാസമായി, അവൾ എന്നോട് ബന്ധപ്പെട്ടിരുന്നില്ല. അടുത്തിടെ സുഹൃത്തുക്കൾ വഴി അവൾ കടുത്ത വിഷാദത്തിലാണെന്നും അവളുടെ മുഴുവൻ സാധനങ്ങളും മോഷ്ടിക്കപ്പെട്ടുവെന്നും അവൾ പട്ടിണിയുടെ വക്കിലാണെന്നും ഞങ്ങൾ മനസ്സിലാക്കുകയായിരുന്നു’ -അമ്മ കത്തിൽ പറയുന്നു.