സാധാരണക്കാരന്‍റെ ട്രെയിൻ യാത്ര എ.സിയിലാക്കാനൊരുങ്ങി റെയിൽവെ; അൺ റിസർവ്​ഡ്​ സെക്കന്‍റ്​​ ക്ലാസ്​ കോച്ചുകൾ എ.സി.യാക്കുന്നു

ന്യൂഡൽഹി: റി​സ​ര്‍​വേ​ഷ​ന്‍ ഇ​ല്ലാ​ത്ത ജനറൽ സെക്കന്‍റ്​​ ക്ലാസ്​ കോച്ചുകൾ എ.സി.യാക്കാനുള്ള പദ്ധതിയുമായി ഇന്ത്യൻ റെയി​ൽവെ. സാധാരണക്കാരന്‍റെ യാത്ര കൂടുതൽ സുഖകരമാക്കുക എന്ന ലക്ഷ്യത്തോടെയാണ്​ പദ്ധതിക്ക്​ രൂപം നൽകിയിരിക്കുന്നത്​. നേരത്തെ അവതരിപ്പിച്ച ഇക്കോണമി എ.സി 3-ടയർ കോച്ചി​ന്​ തുടർച്ചെയായാണ്​ സെക്കന്‍റ്​​​ ക്ലാസ്​ കോച്ചുകളുടെ എ.സി വത്​ക്കരണം.

കപ്പൂർത്തലയിലെ റെയിൽ കോച്ച് ഫാക്ടറിയിലാണ്​ (ആർ‌.സി‌.എഫ്) പുതിയ എ.സി ജനറൽ സെക്കൻഡ് ക്ലാസ് കോച്ച് നിർമ്മിക്കുന്നത്​. ഇൗ പദ്ധതി വഴി സാധാരണക്കാരായ ട്രെയിൻ യാത്രക്കാർക്ക്​ കൂടുതൽ സൗകര്യങ്ങൾ ലഭിക്കുമെന്ന്​ ആർ‌.സി.‌എഫ്​ ജനറൽ മാനേജർ രവീന്ദർ ഗുപ്ത പറഞ്ഞു.

പുതിയ എ.സി ജനറൽ സെക്കൻഡ് ക്ലാസ് കോച്ചി​െന്‍റ രൂപകൽപന അന്തിമഘട്ടത്തിലാണ്​. രൂപകൽപനാ പ്ലാനും ഡിസൈനുകളും റെയിൽ‌വേ ബോർഡ് അംഗീകരിച്ചു കഴിഞ്ഞാൽ ഈ വർഷാവസാനത്തോടെ കോച്ചിന്‍റെ ആദ്യമാതൃക പുറത്തിറക്കാനാകുമെന്നാണ്​ ആർ‌.സി.‌എഫ് പ്രതീക്ഷിക്കുന്നത്​.

നിലവിൽ ജനറൽ സെക്കൻഡ് ക്ലാസ് കോച്ചിൽ 100 പേർക്കാണ്​ ഇരിക്കാൻ കഴിയുക. എന്നാൽ പുതിയ എ.സി ജനറൽ സെക്കൻഡ് ക്ലാസ് കോച്ചിൽ കൂടുതൽ യാത്രക്കാരെ ഉൾക്കൊള്ളാൻ കഴിയും. 130 കിലോമീറ്റർ വേഗതയിൽ സഞ്ചരിക്കാവുന്ന ദീർഘദൂര മെയിൽ/എക്സ്പ്രസ് ട്രെയിനുകളിലാണ്​ ഈ കോച്ചുകൾ ഉപയോഗിക്കുക. എ.സി അല്ലാത്ത കോച്ചുകൾക്ക്​ 110 കിലോമീറ്ററിൽ കൂടുതൽ വേഗതയിൽ സഞ്ചരിക്കാനാകില്ല. മെയിൽ / എക്സ്പ്രസ് ട്രെയിനുകളിൽ സ്ലീപ്പർ ക്ലാസ് കോച്ചുകൾക്ക് പകരമായി അവതരിപ്പിച്ച എക്കണോമി എ. സി 3-ടയർ 180 കിലോമീറ്റർ വരെ വേഗത കൈവരിച്ചിരുന്നു.