വായ്​പ തട്ടിപ്പ്​ നടത്തിയിട്ടില്ലെന്ന്​ ഇൻഡസൻഡ്​​ ബാങ്ക്​

ന്യൂഡൽഹി: വായ്​പ തട്ടിപ്പ്​ നടത്തിയെന്ന ആരോപണത്തിൽ വിശദീകരണവുമായി ഇൻഡസൻഡ് ബാങ്ക്​. ഉപഭോക്​താക്കളുടെ അനുമതിയില്ലാതെ 84,000 വായ്​പകൾ നൽകിയത്​ സാ​ങ്കേതിക തകരാർ മാത്രമാണെന്നാണ്​ വിശദീകരണം. ഫീൽഡ്​ സ്​റ്റാഫ്​ സാ​ങ്കേതിക തകരാറിനെ കുറിച്ച്​ വിശദീകരിച്ചപ്പോൾ തന്നെ നടപടിയെടുത്തുവെന്നും ബാങ്ക്​ വ്യക്​തമാക്കി.ഇൻഡസൻഡിന്‍റെ മൈക്രോഫിനാൻസ്​ സ്ഥാപനത്തിൽ തട്ടിപ്പ്​ നടന്നുവെന്നായിരുന്നു ആരോപണം.

നേരത്തെ ഇൻഡസൻഡ് ബാങ്കിൽ തട്ടിപ്പ്​ നടക്കുന്നുവെന്ന വിവരം ആർ.ബി.ഐക്ക്​ ലഭിച്ചതായി റിപ്പോർട്ടുകളുണ്ടായിരുന്നു. തിരിച്ചടക്കാത്ത വ്യക്​തികൾക്കും അവർ അറിയാതെ തന്നെ വീണ്ടും വായ്​പകൾ ബാങ്ക്​ നൽകിയെന്നായിരുന്നു ഉയർന്ന ആരോപണം. പഴയ വായ്​പകൾ ക്ലോസ്​ ചെയ്​ത്​ ഉപയോക്​താക്കളുടെ പേരിൽ പുതിയത്​ തുടങ്ങുകയായിരുന്നു ബാങ്ക്​ ചെയ്​തത്​. ഇത്തരത്തിൽ ഇടപാട്​ നടത്തു​േമ്പാൾ വർഷങ്ങളായുള്ള വായ്​പ ബാധ്യതകൾ ബാങ്കിന്​ ഒഴിവാക്കാൻ സാധിക്കുമായിരുന്നു. എന്നാൽ ഇത്തരം ആരോപണങ്ങളെല്ലാം ബാങ്ക്​ നിഷേധിച്ചു.

സാ​ങ്കേതിക തകരാർ മൂലം 2021 മേയിൽ 84,000 വായ്​പകൾ നൽകി. എന്നാൽ ഉപഭോക്​താകൾക്ക്​ തുക കൈമാറുന്നതിന്​ മുമ്പ്​ തന്നെ പ്രശ്​നം തിരിച്ചറിഞ്ഞ്​ നടപടിയെടുത്തുവെന്നും ബാങ്ക്​ വിശദീകരിക്കുന്നു. കോവിഡ്​ മൂലം ദുരിതത്തിലായ ചിലർക്ക്​ അധിക വായ്​പ നൽകിയിരുന്നുവെന്ന്​ ബാങ്ക്​ സമ്മതിക്കുന്നുണ്ടെങ്കിലും തട്ടിപ്പ്​ നടത്തിയിട്ടില്ലെന്നാണ്​ വിശദീകരണം.