മിശ്രവിവാഹം വർഗീയ സംഘർഷം കുറക്കും -സുപ്രീംകോടതി

ന്യൂഡൽഹി: മിശ്രവിവാഹത്തിലൂടെ വർഗീയ സംഘർഷങ്ങൾ ഒരു പരിധിവരെ കുറക്കാനാകുമെന്ന്​ സുപ്രീംകോടതി. വിദ്യാസമ്പന്നരായ യുവതലമുറ ജാതിയും മതവും മാറിയുള്ള വിവാഹങ്ങളിൽ അസ്വാഭാവികത കാണുന്നില്ലെന്നും അവരെ സഹായിക്കാൻ കോടതികൾ സന്നദ്ധമാണെന്നും സുപ്രീംകോടതി വിധിന്യായത്തിൽ പറഞ്ഞു.

വിദ്യാസമ്പന്നരായ ആൺകുട്ടികളും പെൺകുട്ടികളും ജാതിക്കും മതത്തിനും അതീതമായി ജീവിതപങ്കാളികളെ തെരഞ്ഞെടുക്കുന്നു. ഇത്​ ജാതി-മത സംഘർഷങ്ങൾ ഒരു പരിധിവരെ കുറയാൻ കാരണമാക്കുമെന്നും ജസ്​റ്റിസ്​ സഞ്​ജയ്​ കിഷൻ കൗളി​‍െൻറ നേതൃത്വത്തിലുള്ള ബെഞ്ച്​ വ്യക്​തമാക്കി.

ബംഗളൂരു സ്വദേശിയായ കോളജ്​ അധ്യാപികയുടെ കേസിൽ വിധി പറയുകയായിരുന്നു കോടതി. എം.ബി.എ ബിരുദധാരിയായ അധ്യാപികയും ഇതര ജാതിയിൽപെട്ട എം.ടെക്​ കാരനായ അധ്യാപകനും തമ്മിൽ പ്രണയിച്ച്​ വിവാഹം കഴിച്ചിരുന്നു. രക്ഷിതാക്കളുടെ പരാതിയിൽ ഭർത്താവിനെ ഉപേക്ഷിച്ച്​ വീട്ടുകാർക്കൊപ്പം പോകാൻ പൊലീസ്​ ഉദ്യോഗസ്​ഥർ യുവതിയെ നിർബന്ധിച്ചു. തുടർന്നാണ്​ യുവതി കോടതിയെ സമീപിക്കുന്നത്​.

വിഷയത്തിൽ പൊലീസിനെയും ശക്​തമായി വിമർശിച്ച കോടതി, അടുത്ത എട്ടാഴ്​ചക്കകം പൊലീസിന്​ ഇത്തരം കേസുകൾ കൈകകാര്യം ചെയ്യുന്നതിന്​ മികച്ച പരിശീലനം നൽകണമെന്നും ആവശ്യ​പ്പെട്ടു. ഹാദിയ കേസ്​ അടക്കം പരാമർശിച്ച ബെഞ്ചിലെ ജസ്​റ്റിസ്​ ഋഷികേശ് റോയ് ജാതി, മതം എന്നിവക്ക്​ അതീതമായി വിവാഹം കഴിക്കുന്ന യുവജനങ്ങൾക്ക്​ കോടതിയുടെ പരിഗണന ഉറപ്പുവരു​ത്തുമെന്നും വ്യക്​തമാക്കി.