മോദി തൊഴിൽ സൃഷ്​ടിച്ചതെങ്ങനെ ? ഇ-ബുക്ക്​ അപ്​ലോഡ്​ ചെയ്​ത്​ പുലിവാല്​ പിടിച്ച്​ ആമസോൺ

ന്യൂഡൽഹി: പ്രധാനമന്ത്രി നരേന്ദ്രമോദിയെ കുറിച്ചുള്ള ഇ-ബുക്കിൽ പുലിവാല്​ പിടിച്ച്​ ആ​മസോൺ. 'മാസ്റ്റർസ്​ട്രോക്ക്​: 420 സീക്രട്ടസ്​ ദാറ്റ്​ ഹെൽപ്പ്​ഡ്​ പി.എം ഇൻ ഇന്ത്യ എംപ്ലോയ്​മെന്‍റ്​ ഗ്രോത്ത്​' എന്ന പേരിൽ ആമസോണിൽ അപ്​ലോഡ്​ ചെയ്യപ്പെട്ട ഇ-ബുക്കാണ്​ നെറ്റിസൺസിനിടയിൽ സംസാരവിഷയമായത്​.

56 പേജുള്ള ബുക്കിന്‍റെ കവർ ചിത്രം മോദിയാണ്​. എന്നാൽ, കവർ ചിത്രം ഒഴിച്ച്​ നിർത്തിയാൽ ബുക്കിനുള്ളിൽ ഒറ്റവരി പോലും ഇല്ല. പൂർണമായും ശൂന്യം. ബെറോസാഗർ ഭക്​ത്​ എന്ന എഴുത്തുകരാനാണ്​ പുസ്​തകം എഴുതിയിരിക്കുന്നത്​. ബെറോസാഗർ എന്നാൽ തൊഴിലില്ലാത്തയാൾ എന്നാണ്​ അർഥം.

തൊഴിലുകൾ വർധിപ്പിക്കാൻ മോദി എന്ത്​ ചെയ്​തുവെന്ന്​ അറിയാൻ രാജ്യം ആഗ്രഹിക്കുന്നു. കോവിഡ്​ പ്രതിസന്ധിയിൽ നിന്ന്​ കരകയറാൻ മഹാനായ നേതാവായ മോദി എങ്ങനെയാണ്​ രാജ്യത്തെ സഹായിച്ചത്​. ഇന്ത്യയിൽ തൊഴിലുകൾ വർധിപ്പിക്കുന്നതിനായി മോദി ചെയ്​ത കാര്യങ്ങൾ വിവരിക്കുകയാണ്​ പുസ്​കത്തിലെന്നാണ്​ അതിന്‍റെ കവറിൽ രേഖപ്പെടുത്തിയിരിക്കുന്നത്​. പുസ്​തകം പുറത്ത്​ വന്നതോടെ അതിനെ ട്രോളി നിരവധി പേരാണ്​ രംഗത്തെത്തിയത്​. പുസ്​തകം വിൽപനക്കുവെച്ച ആമസോൺ ഇ-ബുക്ക്​സിന്‍റെ കമന്‍റ്​ ബോക്​സിലും ട്രോളുകൾ നിറഞ്ഞു. എന്തായാലും കാര്യങ്ങൾ കൈവി​ട്ടെന്ന്​ മനസിലായതോടെ പുസ്​തകം പിൻവലിച്ച്​ ആമസോണും തലയൂരി.