അസ്​താനക്കെതിരെ ശക്​തമായ തെളിവുണ്ടെന്ന്​ അന്വേഷണ ഉദ്യോഗസ്ഥൻ

ന്യൂഡൽഹി: സി.ബി.​െഎയിലെ ആഭ്യന്തര കലഹം വീണ്ടും സുപ്രീം കോടതിയിൽ. മുൻ സ്​പെഷ്യൽ ഡയറക്​ർ രാകേഷ്​ അസ്താനക്കെതിരായ കൈക്കൂലിക്കേസ്​ അന്വേഷിച്ചിരുന്ന ഉദ്യോഗസ്ഥൻ എ.കെ. ബസ്സി അന്തമാനിലേക്ക്​ സ്ഥലം മാറ്റിയതിനെതിരെ സുപ്രീം കോടതിയെ സമീപിച്ചു. അസ്​താനക്കെതിരെ ശക്​തമായ തെളിവ്​ ലഭിച്ചതായും മുൻ അന്വേഷണ ഉദ്യോഗസ്ഥൻ കോടതിയിൽ വ്യക്​തമാക്കി.

കൈക്കൂലി കേസിൽ പെട്ട അസ്​താനയെ കുറിച്ച്​​ അന്വേഷിക്കാൻ പ്രത്യേക അന്വേഷണ സംഘത്തെ നിയോഗിക്കണമെന്നും അദ്ദേഹം ആവശ്യപ്പെട്ടു. ഫോണ്‍രേഖകളും വാട്‌സ്​ആപ്​ സന്ദേശങ്ങളുമടക്കമുള്ള തെളിവുകളും ബസ്സി സുപ്രീം കോടതിക്ക് കൈമാറി.

സി.ബി.ഐ ഡയറക്ടറുടെ താത്കാലിക ചുമതലയേറ്റെടുത്ത എം. നാഗേശ്വര്‍ റാവു, രാകേഷ് അസ്താനക്കെതിരായ കേ​സന്വേഷിക്കുന്ന ബസ്സിയെ പോര്‍ട്ട് ബ്ലെയറിലേക്ക് സ്ഥലം മാറ്റിയിരുന്നു. അതേ ദിവസം തന്നെ സി.ബി.​െഎയിലെ നിരവധി ഒാഫീസർമാരെ സ്ഥലം മാറ്റുകയും അസ്​താനയെയും അലോക്​ വർമയെയും നിർബന്ധിത അവധിയിൽ​​ വിടുകയും ചെയ്​തിരുന്നു.

അസ്​താനയുടെ ഹരജി അടിയന്തിരമായി പരിഗണിക്കാൻ കോടതി വിസമ്മതിച്ചു. അസ്​താനയുടെ അറസ്റ്റ്​ നവംബർ ഒന്നുവരെ ഡൽഹി ഹൈകോടതി തടഞ്ഞിരുന്നു. രാകേഷ്​ അസ്​താന നൽകിയ ഹരജിയിൽ മറുപടി നൽകാത്തതിൽ നീരസം പ്രകടിപ്പിച്ച കോടതി, സി.ബി.​െഎയ്​ക്ക്​ ഒരാഴ്​ച കൂടി സമയം നൽകുകയായിരുന്നു.