മുമ്പ് ഹോട്ട്സ്പോട്ട്, ഇപ്പോൾ കോവിഡ് മുക്തം; ഇസ്​ലാംപുർ പട്ടണം വൈറസിനെ തുരത്തിയത് ഇങ്ങനെ

മുംബൈ: അച്ചടക്കത്തോടെ കോവിഡിനെ നേരിട്ട്​ മഹാരാഷ്​ട്രയിലെ സാംഗ്ളി ജില്ലയിലെ ഇസ്​ലാംപുർ പട്ടണം രോഗമുക്​ത ിയിലേക്ക്​ എത്തുമ്പോൾ അഭിനന്ദനമേറ്റുവാങ്ങുകയാണ് ആരോഗ്യപ്രവർത്തകരും ജീവനക്കാരും. മഹാരാഷ്ട്രയാകെ കോവിഡിന്‍ റെ ഭീതിനിഴലിലാകുമ്പോൾ ഇസ്​ലാംപുർ പട്ടണം കാണിച്ചുകൊടുത്ത മാതൃക മുംബൈ നഗരത്തിൽ ഉൾപ്പെടെ നടപ്പാക്കാനൊരുങ്ങുകയാണ് സർക്കാർ.

ഉംറ​ തീർഥാടനം കഴിഞ്ഞ്​​ മാർച്ച്​ 18 ന്​ തിരിച്ചെത്തിയവരും അവരുടെ കുടുംബാംഗങ്ങളും പൂണെയിൽ നിന്ന്​ വന്നയാളുമടക്കം 25 പേർക്കാണ്​ ഇസ്​ലാംപുരിൽ കോവിഡ്​ സ്ഥിരീകരിച്ചിരുന്നത്​. ഇതോടെ കോവിഡ് ഹോട്ട്സ്പോട്ട് ആയി. എന്നാൽ, വെള്ളിയാഴ്​ചയോടെ 22 പേർ രോഗമുക്​തരായി ആശുപത്രിവിടുമ്പോൾ സാംഗ്​ളിയുടെ രക്ഷാകർതൃ മന്ത്രി ജയന്ത്​ പാട്ടീലിനും മുംബൈയിൽ നിന്ന്​ കുതിച്ചെത്തി പ്രതിരോധ നടപടികൾക്ക്​ ചുക്കാൻ പിടിച്ച ജെ.ജെ മെഡിക്കൽ കോളജ്​ ഡീൻ പല്ലവി സപ്​ലെയുടെ നേതൃത്വത്തിലെ ഡോക്​ടർ പടക്കും ആശ്വാസ നിമിഷങ്ങൾ.

വൈറസ്​ ബാധിച്ചവർ വിവാഹത്തിൽ​ പങ്കെടുത്തത്​ ദുരന്തമായി മാറുമെന്നായിരുന്നു പ്രവചനങ്ങൾ. സമൂഹ വ്യാപന സാധ്യത ഏറെയായിരുന്നു. എന്നാൽ, ആരോഗ്യ പ്രവർത്തകരുടെയും പൊലീസിന്‍റെയും കൃത്യതയുള്ള നീക്കങ്ങളും ജനങ്ങളുടെ അച്ചടക്കവും വൻ ദുരന്തത്തിൽ നിന്ന്​ നാടിനെ രക്ഷിച്ചുവെന്ന്​ ജയന്ത്​ പാട്ടീൽ പറഞ്ഞു.

രണ്ട്​ ഘട്ടങ്ങളിലായി വൈറസ് ബാധയേറ്റവരെയും സാധ്യതയുള്ളവരെയും കണ്ടെത്തി. രോഗികളെ ചികിത്സക്ക്​ വിധേയമക്കുകയും ശേഷിച്ചവരെ നിരീക്ഷണത്തിൽ പാർപ്പിക്കുകയും ചെയ്​ത ശേഷം രോഗം കണ്ടെത്തിയ പ്രദേശത്തിലെ ഒരു കിലോമീറ്റർ ചുറ്റളവ്​ അച്ചുപൂട്ടി.

സമൂഹ വ്യാപന സാധ്യതയുള്ള മേഖല കണ്ടെത്തി നിരീക്ഷണമേർപ്പെടുത്തുകയും എല്ലാ ദിവസവും ആരോഗ്യ പരിശോധനകൾ നടത്തുകയും ചെയ്​തു. എല്ലാ വീടുകളും ആരോഗ്യ പ്രവർത്തകർ സന്ദർശിച്ചു. ഒരു വിട്ടുവീഴ്ചയുമില്ലാതെ ഇസ്​ലാംപുരിൽ ലോക്​ഡൗൺ പൂർണ്ണമായും നടപ്പാക്കി.

കേരളവും രാജസ്​ഥാനിലെ ഭിൽവാരയുമായിരുന്നു ഇസ്​ലാംപുരിന്‍റെ മാതൃക. അനുദിനം രോഗികളുടെ എണ്ണം കൂടുന്ന മുംബൈ നഗരത്തിലും ഇതേ മാതൃക പിന്തുടരുകയാണിപ്പോൾ.