ജോധ്പൂർ സംഘർഷം: രണ്ട് പൊലീസ് ഉദ്യോ​ഗസ്ഥർക്ക് പരിക്ക്; കടയും വാഹനങ്ങളും കത്തിച്ച് പ്രതിഷേധക്കാർ

ജയ്പൂർ: രാജസ്ഥാനിലെ ജോധ്പൂരിലുണ്ടായ സംഘർഷത്തിൽ രണ്ട് പൊലീസുദ്യോ​ഗസ്ഥർക്ക് പരിക്ക്. കലാപക്കാർ ഒരു കടയ്ക്ക് തീയിടുകയും രണ്ട് വാഹനങ്ങൾക്ക് കേടുപാടുണ്ടാക്കുകയും ചെയ്തിരുന്നു. ഈദ്​ഗാഹിൽ ​ഗേറ്റ് നിർമിക്കുന്നതുമായി ബന്ധപ്പെട്ടാണ് പ്രദേശത്ത് വർ​ഗീയ സംഘർഷം പൊട്ടിപ്പുറപ്പെടുന്നത്.

വെള്ളിയാഴ്ച രാത്രിയോടെയായിരുന്നു കലാപം തുടങ്ങുന്നത്. സൂർ സാ​ഗർ പ്രദേശത്തെ രാജാറാം സർക്കിളിന് സമീപമുള്ള ഈദ്​ഗാഹിൻ്റെ പിൻവശത്ത് ​ഗേറ്റ് നിർമിക്കുന്നതുമായി ബന്ധപ്പെട്ട് ചർച്ചകൾ നടന്നിരുന്നു. എന്നാൽ പ്രദേശവാസികൾ ​ഗേറ്റ് നിർമിക്കുന്നത് എതിർത്തതോടെ ഇരു സംഘവും തമ്മിൽ തർക്കം രൂക്ഷമായി. ഇതോടെയാണ് കല്ലേറും മറ്റ് അതിക്രമങ്ങളും നടക്കുന്നത്.

സംഘർഷം നിയന്ത്രണ വിധേയമായെങ്കിലും കഴിഞ്ഞ ദിവസം രാത്രിയോടെ സ്ഥിതി​ഗതികൾ വീണ്ടും മോശമാകുകയായിരുന്നു. സംഭവസ്ഥലത്തെത്തിയ പൊലീസ് ഉദ്യോ​ഗസ്ഥർക്ക് നേരെ സംഘം കല്ലെറിയുകയും ഇവരെ പിരിച്ചുവിടാൻ ശ്രമിക്കുന്നതിനിടെ കടയ്ക്കും, വഴിയരികിൽ നിർത്തിയിട്ടിരുന്ന ട്രാക്ടറിനും അക്രമികൾ തീ കൊളുത്തുകയുമായിരുന്നു.

കണ്ണീർവാതകം ഉൾപ്പെടെ ഉപയോ​ഗിച്ചാണ് പൊലീസ് സംഘത്തെ പിരിച്ചുവിട്ടത്.

അതേസമയം ഇരുവിഭാ​ഗങ്ങളിൽ നിന്നും ലഭിച്ച പരാതിയുടെ അടിസ്ഥാനത്തിൽ രണ്ട് എഫ്.ഐ.ആർ രജിസ്റ്റർ ചെയ്തതായി പൊലീസ് അറിയിച്ചു. സംഭവവുമായി ബന്ധപ്പെട്ട് ഇരുവിഭാ​ഗങ്ങളിൽ നിന്നുള്ളവരെയും അറസ്റ്റ് ചെയ്തിട്ടുണ്ട്. മറ്റുള്ളവർക്കായുള്ള തെരച്ചിൽ പുരോ​ഗമിക്കുകയാണെന്നും പൊലീസ് കമീഷണർ രാജേന്ദ്ര സിങ് അറിയിച്ചു.