മാധ്യമപ്രവർത്തനം തുടങ്ങിയത്​ മഹാഭാരത കാലത്തെന്ന്​ യു.പി ഉപമുഖ്യമന്ത്രി

മഥുര: ആധുനിക മനുഷ്യ സംസ്​കൃതിയുടെ നേട്ടങ്ങൾ പൗരാണിക ഇന്ത്യയു​മായി കൂട്ടിക്കെട്ടുന്ന പ്രസ്​താവനകൾ അവസാനിക്കുന്നില്ല. യു.പി ഉപ മുഖ്യമന്ത്രി ദിനേഷ്​ ശർമയാണ്​ ഇൗ വിധത്തിലുള്ള പുതിയ പ്രസ്​താവന നടത്തിയത്​. മാധ്യമപ്രവർത്തനം മഹാഭാരത കാലത്താണ്​ തുടങ്ങിയത്​ എന്നാണ്​ അദ്ദേഹം പറഞ്ഞത്​. ഹിന്ദി മാധ്യമ പ്രവർത്തന ദിനാചരണം നടക്കുന്ന വേളയിൽ സംസാരിക്കുകയായിരുന്നു അദ്ദേഹം.

മാധ്യമ പ്രവർത്തനത്തി​​​െൻറ തുടക്കം സംബന്ധിച്ച വിവിധ സിദ്ധാന്തങ്ങൾ നിരാകരിച്ചാണ്​ ദിനേഷ്​ ശർമ മഹാഭാരത കാലത്താണ്​ അതി​​​െൻറ തുടക്കമെന്ന്​ തട്ടിവിട്ടത്​. ഇത്​ സാധൂകരിക്കാനായി മഹാഭാരതത്തിലെ വിവിധ സന്ദർഭങ്ങളും അദ്ദേഹം ഉദ്ധരിച്ചു. ഹസ്​തിനപുരിയിലെ സഞ്​ജയൻ മഹാഭാരത യുദ്ധത്തി​​​െൻറ വിശദ ചിത്രം ധൃതരാഷ്​ട്രർക്ക്​ മുമ്പാകെ അവതരിപ്പിക്കുന്നുണ്ട്​. ഇത്​ തത്സമയ സംപ്രേഷണമല്ലാതെ എന്താണ്​? -മന്ത്രി ചോദിച്ചു.

നാരദനെ മന്ത്രി ഉപമിച്ചതാക​െട്ട, ഗൂഗ്​ളിനോടും. നാരദ മുനി വിവരങ്ങളുടെ ശേഖരമായിരുന്നുവെന്ന്​ അദ്ദേഹം കൂട്ടിച്ചേർത്തു.തിമിര ശസ്​ത്രക്രിയ, പ്ലാസ്​റ്റിക്​ സർജറി, ഗുരുത്വാകർഷണ സിദ്ധാന്തം, ആണവ പരീക്ഷണം, ഇൻറർനെറ്റ്​ തുടങ്ങിയ പല കാര്യങ്ങളും പൗരാണിക ഭാരതത്തിലാണ്​ തുടങ്ങിയതെന്ന പരാമർശം നടത്തി മുമ്പും സംഘ്​ നേതാക്കൾ പരിഹാസ്യരായിട്ടുണ്ട്​.