വാർത്ത സൃഷ്​ടിക്കാൻ വ്യക്​തിയുടെ ജീവൻ അപകടത്തിലാക്കിയെന്ന്​​: മാധ്യമ പ്രവർത്തകരുടെ ജാമ്യാപേക്ഷ തള്ളി കോടതി

ലഖ്​​നോ: ജപ്​തി ഭീഷണി നേരിട്ടയാളെ ആത്​മഹത്യ ചെയ്യാൻ പ്രേരിപ്പിച്ചെന്നാരോപിച്ച്​ അറസ്​റ്റിലായ മാധ്യമ പ്രവർത്തകരുടെ ജാമ്യാപേക്ഷ തള്ളി ​അലഹബാദ്​ ഹൈകോടതി. ഉദ്വോഗജനകമായ വാർത്ത സൃഷ്​ടിക്കാൻ വ്യക്​തിയുടെ ജീവൻ അപകടത്തിലാക്കുന്ന പ്രവൃത്തിയാണ്​ മാധ്യമപ്രവർത്തകരിൽ നിന്നുണ്ടായതെന്ന്​​ നിരീക്ഷിച്ചാണ്​ ജസ്​റ്റിസ്​ വികാസ്​ കുൻവർ ശ്രീവാസ്​തവയുടെ നടപടി​.

കഴിഞ്ഞ ഒക്​ടോബർ 24ന്​ ​​ഉത്തർപ്രദേശ്​ നിയമസഭ മന്ദിരത്തിന്​ സമീപം യുവാവ്​ തീകൊളുത്തി ആത്​മഹത്യ ചെയ്​തതുമായി ബന്ധപ്പെട്ടാണ്​ മാധ്യമ പ്രവർത്തകരായ ഷമീം അഹമ്മദ്​, നൗഷാദ്​ അഹമ്മദ്​ എന്നിവർ അറസ്​റ്റിലായത്​. ഉദ്വോഗജനകമായ വാർത്ത സൃഷ്​ടിക്കാൻ ഇരുവരും ചേർന്ന്​ ജപ്​തി ഭീഷണി നേരിട്ടയാളെ ആത്മഹത്യക്ക്​ പ്രേരിപ്പിച്ചുവെന്നായിരുന്നു പൊലീസ്​ കേസ്​. യുവാവ്​ തീകൊളുത്തി ആത്മഹത്യ ചെയ്യുന്നത്​ വീഡിയോ പകർത്തി വാർത്തയാക്കിയെന്നാണ്​ ആരോപണം.