'സഖാവ്​' ആര്യാ രാജേന്ദ്രന്​ അഭിനന്ദനം; തമിഴ്​നാടും മാറ്റത്തിന്​ തയ്യാർ -കമൽഹാസൻ

തിരുവനന്തപുരം നഗരത്തിന്‍റെ മേയറായി തെര​െഞ്ഞടുക്കപ്പെട്ട ആര്യാ രാജേന്ദ്രനെ​ അഭിനന്ദിച്ച്​ നടനും മക്കൾ നീതി മയ്യം നേതാവുമായ കമൽഹാസൻ. 'ചെറു പ്രായത്തിൽ തന്നെ തിരുവനന്തപുരം നഗരത്തിന്‍റെ മേയറായി തെര​െഞ്ഞടുക്കപ്പെ സഖാവ്​ ആര്യാ രാജേന്ദ്രന്​ ഹൃദയം നിറഞ്ഞ അഭിനന്ദനങ്ങൾ. തമിഴ്​നാടും മാറ്റത്തിന്​ തയ്യാറാണ്​'-കമൽ സമൂഹമാധ്യമത്തിൽ കുറിച്ചു.

സ്ത്രീ ശാക്തീകരണത്തിനാണ് തന്‍റെ പാർട്ടിയായ മക്കൾ നീതി മയ്യം മുൻഗണന നൽകുന്നതെന്ന് കമൽ നേ​രത്തേ പ്രഖ്യാപിച്ചിരുന്നു. തമിഴ്നാട് നിയമസഭാ തെരഞ്ഞെടുപ്പിൽ അധികാരത്തിൽ വന്നാൽ വീട്ടമ്മമാര്‍ക്ക് മാസശമ്പളം നല്‍കുമെന്നും എല്ലാ വീടുകളിലും ഇന്‍റര്‍നെറ്റ് എത്തിക്കുമെന്നതുമടക്കം നിരവധി വാഗ്​ദാനങ്ങളാണ്​ കമലും പാർട്ടിയും മുന്നോട്ട്​ വച്ചിരിക്കുന്നത്​. മുടവൻമുകൾ വാർഡിൽ നിന്നുള്ള അംഗമാണ് മേയറായ ആര്യാ രാജേന്ദ്രൻ. ആര്യ മേയറാകുന്നതോടെ രാജ്യത്തെ തന്നെ ഏറ്റവും പ്രായം കുറഞ്ഞ മേയറെന്ന അപൂര്‍വ നേട്ടമാണ് ആര്യക്കും തിരുവനന്തപുരത്തിനും സ്വന്തമാകുന്നത്.

നേരത്തെ മേയര്‍ സ്ഥാനത്തേക്ക് പല പേരുകള്‍ ഉയര്‍ന്നിരുന്നുവെങ്കിലും അപ്രതീക്ഷിതമായാണ് ആര്യക്ക്​ നറുക്ക് വീണത്. യുവ വനിതാ നേതാവ്, പൊതുസമ്മതിയുള്ള മുഖം മേയറായി വരുന്നത് എല്ലാം പാര്‍ട്ടിക്ക് ഗുണം ചെയ്യുമെന്നാണ് പാര്‍ട്ടിയുടെ കണക്ക് കൂട്ടല്‍. ആള്‍ സെയിന്‍റ്​സ് കോളേജിലെ ബിഎസ്.സി മാത്‌സ് വിദ്യാർഥിനിയായ ആര്യ എസ്.എഫ്.ഐ സംസ്ഥാന കമ്മിറ്റി അംഗം, സി.പി.എം കേശവദേവ് റോഡ് ബ്രാഞ്ച് കമ്മിറ്റി അംഗം, ബാലസംഘം സംസ്ഥാന പ്രസിഡന്‍റ്​ എന്നീ നിലകളില്‍ പ്രവര്‍ത്തിക്കുന്നു.