ശിവസേനയല്ല; സോണിയ സേന​യെന്ന്​ കങ്കണ

മുംബൈ: ശിവസേനക്കും മഹാരാഷ്​ട്ര മുഖ്യമന്ത്രി ഉദ്ധവ്​ താക്കറെക്കുമെതിരെ വീണ്ടും രൂക്ഷവിമർശനവുമായി ബോളിവുഡ്​ നടി കങ്കണ റണാവത്ത്​. ആശയങ്ങളിൽ വെള്ളംചേർത്ത് ശിവസേന​ സോണിയ സേനയായി മാറിയെന്ന്​ കങ്കണ പരിഹസിച്ചു.

ശിവസേനയുമായി സഖ്യമുണ്ടാക്കിയതാണ്​ മഹാരാഷ്​ട്ര മുൻ മുഖ്യമന്ത്രി ദേവേന്ദ്ര ഫഡ്​നാവിസ്​ ചെയ്​ത കുറ്റം. തെരഞ്ഞെടുപ്പിൽ തോറ്റതിന്​ പിന്നാലെ നാണമില്ലാതെ കോൺഗ്രസുമായി ചേർന്ന്​ സർക്കാറുണ്ടാക്കി ​ശിവസേന സോണിയ സേനയായി മാറിയെന്നും അവർ പറഞ്ഞു.

ബാൽതാക്കറെയുടെ ആശയമാണ്​ ശിവസേനയെ സൃഷ്​ടിച്ചത്​. ഇപ്പോൾ അധികാരത്തിനായി അവർ താക്കറെയുടെ ആശയങ്ങളെ വിൽപനക്ക്​ വെച്ചിരിക്കുകയാണ്​. ഗുണ്ടകളെ ഉപയോഗിച്ച്​ എൻെറ വീട്​ തകർത്ത്​ ഭരണഘടനയെ നോക്കുകുത്തിയാക്കരുതെന്നും കങ്കണ ആവശ്യപ്പെട്ടു.

പിതാവിൻെറ നല്ല പ്രവർത്തികൾ നിങ്ങൾക്ക്​ സമ്പത്ത്​ നേടി തന്നു. എന്നാൽ, ബഹുമാനം നിങ്ങൾ സ്വന്തമായി നേടണം. നിങ്ങൾക്ക്​ എൻെറ ശബ്​ദത്തെ നിശബ്​ദമാക്കാം. എന്നാൽ ലക്ഷക്കണക്കിന്​ ആളുകൾ എനിക്ക്​ വേണ്ടി ശബ്​ദിക്കാനുണ്ടാവുമെന്നും കങ്കണ പറഞ്ഞു.