കർണാടക മുഖ്യമന്ത്രി ബി.എസ് യെദ്യൂരപ്പ കോവിഡ്​ മുക്തനായി ആശുപത്രി വിട്ടു

ബംഗളൂരു​: കർണാടക മുഖ്യമന്ത്രി ബി.എസ് യെദ്യൂരപ്പ കോവിഡ് മുക്തനായി. കോവിഡ്​ ബാധിച്ച്​ ബെംഗളൂരുവിലെ മണിപ്പാൽ ആശുപത്രിയിൽ പ്രവേശിപ്പിക്കപ്പെട്ട അദ്ദേഹം കോവിഡ്​ നെഗറ്റീവായതിനെ തുടർന്ന്​ ആശു​പത്രിവിട്ടു.

77കാരനായ യെദ്യൂരപ്പയെ കോവിഡ്​ രോഗലക്ഷണങ്ങളെ തുടർന്നാണ്​ ആശ​ുപത്രിയിൽ പ്രവേശിച്ചത്​. അദ്ദേഹം ദിവസങ്ങൾക്ക​​ുള്ളിൽ സ​ുഖം പ്രാപിച്ചെങ്കിലും ഡോക്ടർമാരുടെ നിർദേശപ്രകാരം ആശുപത്രിയിൽ തുടരു​കയായിരുന്നു.

ആശുപത്രിയിൽ ആയിരുന്നപ്പോഴും മുഖ്യമന്ത്രി ജോലിയിൽ ഏർപ്പെട്ടിരുന്നു. സുപ്രധാന ഫയലുകൾ പരിശോധിക്കുകയും ആശുപത്രിയിൽ നിന്ന് അവലോകന യോഗങ്ങൾ നടത്തുകയും ചെയ്തുവെന്ന് അധികൃതർ പറഞ്ഞു. മുഖ്യമന്ത്രിയുടെ ഓഫീസിലെ ആറു ജീവനക്കാർക്ക​​ും കോവിഡ്​ ബാധിച്ചിരുന്നു.

കോവിഡ്​ പോസിറ്റീവായ പ്രതിപക്ഷ നേതാവും മുൻ മുഖ്യമന്ത്രിയുമായ സിദ്ധരാമയ്യയും (71) ഇതേ ആശുപത്രിയിൽ സുഖം പ്രാപിച്ചുവരികയാണ്. ആരോഗ്യമന്ത്രി ബി.ശ്രീരാമലുവും കോവിഡ്​ ബാധിതനായി. ഇദ്ദേഹം സർക്കാർ ആശുപത്രിയിൽ ചികിത്സയിലാണ്​.

മുഖ്യമന്ത്രിയുടെ മകളായ പദ്മാവതിക്കും വൈറസ് ബാധയുണ്ടായിരുന്നു. എന്നാൽ മകൻ വിജയേന്ദ്രയു​ടെ കോവിഡ്​ ഫലം നെഗറ്റീവായിരുന്നു.

ഏറ്റവും കൂടുതൽ കോവിഡ്​ കേസുകളുള്ള നാലാമത്തെ സംസ്ഥാനമായ കർണാടകയിൽ ഇതുവരെ 1.78 ലക്ഷം പേർക്കാണ്​ രോഗബാധയുള്ളത്​. 3,100 കോവിഡ്​ മരണങ്ങളും റിപ്പോർട്ട്​ ചെയ്​തിട്ടുണ്ട്​.