കർണാടക ആരോഗ്യമന്ത്രിക്ക്​ കോവിഡ്​

ബംഗളൂരു: കർണാടക ആരോഗ്യ മന്ത്രി ബി. ശ്രീ​രാമുലുവിന്​ കോവിഡ്​ സ്​ഥിരീകരിച്ചു. ഞായറാഴ്​ച വൈകീട്ട്​ മന്ത്രി ത​ന്നെയാണ് ഇക്കാര്യം ട്വിറ്ററിലൂടെ അറിയിച്ചത്​. പനി ബാധിച്ചതിനെ തുടർന്ന്​ ആശുപത്രിയിൽ പ്രവേശിപ്പിച്ച മന്ത്രിയുടെ കോവിഡ്​ പരിശോധനാ ഫലം പോസിറ്റീവ്​ ആവുകയായിരുന്നു. കോവിഡ്​ വ്യാപന പശ്​ചാത്തലത്തിൽ താൻ 30 ജില്ലകളിലും സന്ദർശനം നടത്തിയിരുന്നതായും അടുത്തിടെ താനുമായി സമ്പർക്കം പുലർത്തിയവർ മുൻകരുതൽ നടപടികൾ സ്വീകരിക്കണമെന്നും അദ്ദേഹം പറഞ്ഞു.

കർണാടക മുഖ്യമന്ത്രി ബി.എസ്​. യെദിയൂരപ്പയും പ്രതിപക്ഷ നേതാവും മുൻ മുഖ്യമന്ത്രിയുമായ സിദ്ധരാമയ്യയും കോവിഡ്​ ബാധിച്ച്​ മണിപ്പാൽ ആശുപത്രിയിൽ ചികിത്സയിലാണ്​. കഴിഞ്ഞദിവസം ആശുപത്രിയിലെത്തിയ ആരോഗ്യമന്ത്രി ബി. ശ്രീരാമുലു ഇരുവരുടെയും ആരോഗ്യനില സംബന്ധിച്ച്​ മുതിർന്ന ഡോക്​ടർമാരുമായി ചർച്ച നടത്തിയിരുന്നു.

കർണാടകയിൽ കോവിഡ്​ കേസുകൾ വർധിച്ചുവരുന്ന സാഹചര്യത്തിൽ രണ്ടാഴ്​ച മുമ്പ്​ മന്ത്രി ശ്രീരാമുലു വിവാദ പ്രസ്​താവന നടത്തി വെട്ടിലായിരുന്നു. 'കർണാടകക്ക്​ ഇനി ദൈവം മാത്രം തുണ' എന്നായിരുന്നു ആരോഗ്യമന്ത്രിയുടെ അന്നത്തെ കമൻറ്​. കോവിഡ്​ പ്രതിസന്ധി കൈകാര്യം ചെയ്യുന്നതിൽ യെദിയൂരപ്പ സർക്കാറി​ന്‍റെ വീഴ്​ചയാണ്​ ആരോഗ്യ മന്ത്രിയുടെ പ്രസ്​താവനയിൽ തെളിഞ്ഞതെന്നായിരുന്നു പ്രതിപക്ഷത്തി​ന്‍റെ വിമർശം. പ്രസ്​താവന വിവാദമായതോടെ, ദൈവത്തി​ന്‍റെ അനുഗ്രഹം തേടുകയാണ്​ താൻ ചെയ്​തതെന്നും മാധ്യമങ്ങൾ തന്‍റെ പ്രസ്​താവന വളച്ചൊടിക്കുകയായിരുന്നെന്നും മന്ത്രി പ്രതികരിച്ചിരുന്നു.

ശനിയാഴ്​ച 7178 പേർക്ക്​ ​കോവിഡ്​ സ്​ഥിരീകരിച്ച കർണാടകയിൽ ആകെ ​രോഗികളുടെ എണ്ണം 1,72,102 ൽ എത്തി. ഇതുവരെ 3091 പേരാണ്​ മരണത്തിന്​ കീഴടങ്ങിയത്​.