കർണാടകയിൽ തദ്ദേശീയർക്ക് തൊഴിൽ സംവരണം; ബിൽ മരവിപ്പിച്ചു

ബംഗളൂരു: കർണാടകയിൽ സ്വകാര്യമേഖലയിലെ മാനേജ്മെന്റ് തസ്തികകളിൽ 50 ശതമാനവും നോൺ മാനേജ്മെന്റ് തസ്തികകളിൽ 75 ശതമാനവും തദ്ദേശീയർക്ക് സംവരണം ഉറപ്പുവരുത്തുന്ന ബിൽ സർക്കാർ മരവിപ്പിച്ചു. മന്ത്രിസഭ അനുമതി നൽകിയ ബില്ലിനെതിരെ വിവിധ കോണുകളിൽനിന്ന് എതിർപ്പ് ശക്തമായതോടെയാണ് തീരുമാനം. ബിൽ തൽക്കാലം തടഞ്ഞുവെക്കുന്നതായും വരുംദിവസങ്ങളിൽ ഇതിൽ പുനഃപരിശോധന നടത്തി തീരുമാനമെടുക്കുമെന്നും മുഖ്യമന്ത്രി സിദ്ധരാമയ്യ ബുധനാഴ്ച രാത്രിയോടെ അറിയിച്ചു.

കന്നഡിഗർക്കു പുറമെ, കർണാടകയിൽ 15 വർഷത്തിലേറെ താമസിക്കുന്നവർക്കും സംവരണം ഉറപ്പുവരുത്തുന്നതാണ് കർണാടക സ്റ്റേറ്റ് എംപ്ലോയ്മെന്റ് ഓഫ് ലോക്കൽ കാൻഡിഡേറ്റ്സ് ഇൻ ദി ഫാക്ടറീസ് ആൻഡ് അദർ എസ്റ്റാബ്ലിഷ്​​മെന്റ്സ് ബിൽ. ബിൽ ശുപാർശ ചെയ്യുന്ന 50 ശതമാനം, 75 ശതമാനം സംവരണത്തിന് പുറമെ, സംസ്ഥാനത്തെ എല്ലാ സ്വകാര്യ സ്ഥാപനങ്ങളിലും ഗ്രൂപ്പ് സി, ഗ്രൂപ്പ് ഡി കാറ്റഗറികളിൽ 100 ശതമാനവും സംവരണവും ലക്ഷ്യമിടുന്നുണ്ടെന്ന് ബുധനാഴ്ച മുഖ്യമന്ത്രി സിദ്ധരാമയ്യ എക്സിൽ കുറിച്ചിരുന്നു. വിമർശനമേറിയതോടെ പിന്നീട് ഈ പോസ്റ്റ് പിൻവലിച്ചു. 100 ശതമാനം സംവരണം സർക്കാർ പരിഗണനയിലില്ലെന്ന് തൊഴിൽ മന്ത്രി സന്തോഷ് ലാഡ് വ്യക്തമാക്കി.

അതേസമയം, കർണാട സർക്കാറിന്റെ തൊഴിൽ സംവരണ നീക്കത്തിനെതിരെ നാനാഭാഗത്തുനിന്നും വൻ വിമർശനമുയർന്നു. രാജ്യത്തിന്റെ ഐ.ടി തലസ്ഥാനമെന്ന വിളിപ്പേരുള്ള ബംഗളൂരുവിന്റെ വ്യാവസായിക മുന്നേറ്റത്തിന് തടയിടുന്നതാണ് ദീർഘ വീക്ഷണമില്ലാത്ത ഈ നീക്കമെന്നാണ് വിമർശനം. മത്സരക്ഷമതയുടെ ഈ കാലഘട്ടത്തിൽ ഇത്തരമൊരു ബിൽ നിരാശയുളവാക്കുന്നതാണെന്ന് നാഷനൽ ​അസോസിയേഷൻ ഓഫ് സോഫ്റ്റ്വെയർ ആൻഡ് സർവിസ് കമ്പനീസ് (നാസ്കോം) പ്രതികരിച്ചു. സംസ്ഥാന സർക്കാർ പ്രതിനിധികളുമായി വിഷയം ചർച്ച ചെയ്യാൻ നാസ്കോം യോഗം വിളിച്ചിട്ടുണ്ട്.

സൂപ്പർ വൈസർ, മാനേജർ, ​ടെക്നിക്കൽ, ഓപറേഷൻസ്, അഡ്മിനിസ്ട്രേറ്റീവ് അടക്കമുള്ള മാനേജ്മെന്റ് കാറ്റഗറി ജോലികളിലാണ് 50 ശതമാനം സംവരണം ബിൽ ശിപാർശ ചെയ്യുന്നത്. ഐടി-ഐടി ഇതര കമ്പനികളിലെ ക്ലറിക്കൽ, അൺ സ്കിൽഡ്, സെമി സ്കിൽഡ് ജോലികളിലും കരാർ, കാഷ്വൽ ജോലികളിലും 75 ശതമാനം സംവരണവുമാണ് ബില്ലിലൂടെ ലക്ഷ്യമിടുന്നത്.

കന്നഡ എഴുതാനും വായിക്കാനുമറിയണമെന്നതാണ് ജോലി ലഭിക്കാനുള്ള പ്രധാന നിബന്ധന. കന്നഡ ഭാഷ പഠിച്ചതായി തെളിയിക്കാൻ എസ്.എസ്.എൽ.സി സർട്ടിഫിക്കറ്റ് ഹാജരാക്കണം. കുടിയേറ്റക്കാരാണെങ്കിൽ നോഡൽ ഏജൻസി നടത്തുന്ന ഭാഷാ പരീക്ഷ പാസാകണം. യോഗ്യതയുള്ള ഉദ്യോഗാർഥികളെ ലഭിച്ചില്ലെങ്കിൽ ഇക്കാര്യത്തിൽ സ്ഥാപനങ്ങൾക്ക് ഇളവുതേടാവുന്നതാണ്. നിയമം ലംഘിക്കുന്നവരിൽനിന്ന് 10,000 മുതൽ 25,000 രൂപ വരെ പിഴയായി ഈടാക്കാമെന്നും ബിൽ വ്യവസ്ഥ ചെയ്യുന്നു.

ബില്ലിനെതിരെ രൂക്ഷ വിമർശനമാണ് വ്യവസായ ലോകത്തുനിന്നുയരുന്നത്. സംവരണം നടപ്പാക്കുന്നതോടെ ഐ.ടി കമ്പനികൾ ബംഗളൂരു വിട്ട് അമരാവതിയിലേക്കോ ഗുജറാത്തിലേക്കോ പറിച്ചുനടുമെന്ന് പേടിഎം വൈസ പ്രസിഡന്റ് സൗരഭ് ജയിൻ എക്സിൽ കുറിച്ചു. ടെക് ഹബ്ബെന്ന നിലയിൽ നിപുണരായ തൊഴിലാളികളെയാണ് നമുക്ക് വേണ്ടതെന്നും തദ്ദേശീയർക്ക് ജോലി നൽകുമ്പോൾ അത് ബാംഗ്ലൂരിന്റെ സാ​ങ്കേതിക മേഖലയിലെ ഉന്നത സ്ഥാനത്തെ ബാധിക്കുന്ന തരത്തിലാവരുതെന്നും ബയോകോൺ എം.ഡി കിരൺ മജുംദാർ ഷോ ചൂണ്ടിക്കാട്ടി.