'കശ്മീരിനെ വിൽപനക്ക്​ വെച്ചിരിക്കുന്നു'; റിയൽ എസ്​റ്റേറ്റ്​ സമ്മിറ്റിനെതിരെ രൂക്ഷവിമർശനവുമായി പ്രതിപക്ഷം

ശ്രീനഗർ: കേന്ദ്ര സർക്കാറിന്‍റെ ഒത്താശയോടെ ജമ്മു-കശ്മീർ സർക്കാർ നടത്തുന്ന റിയൽ എസ്​റ്റേറ്റ്​ സമ്മിറ്റിനെതിരെ രൂക്ഷ വിമർശനമുയർത്തി പ്രതിപക്ഷ പാർട്ടികൾ. കശ്മീർ ജനതയുടെ അസ്ഥിത്വം ഇല്ലാതാക്കുകയും ജനസംഖ്യാപരമായി അനുഭവിക്കുന്ന അവകാശങ്ങളിൽ മാറ്റംവരുത്തുകയുമാണ്​​ സർക്കാർ ലക്ഷ്യമിടുന്നതെന്ന്​​ പി.ഡി.പി അധ്യക്ഷ മഹ്​ബൂബ മുഫ്തി ആരോപിച്ചു. ജമ്മു-കശ്​മീരിന്‍റെ പ്രത്യേക അധികാരം അന്യായമായി കേന്ദ്രം എടുത്തുകളഞ്ഞ സർക്കാർ, ഇ​പ്പോൾ ഞങ്ങളുടെ വിഭവങ്ങൾ കൊള്ളയടിച്ച്​ വിൽക്കാനാണ്​ ശ്രമിക്കുന്നതെന്നും മഹ്​ബൂബ പറഞ്ഞു.

റിയൽ എസ്​റ്റേറ്റ്​ സമ്മിറ്റിലൂടെ കശ്മീരിനെ വിൽപനക്ക്​ വെച്ചിരിക്കുകയാണ്​ സർക്കാറെന്ന്​​ നാഷനൽ കോൺഫറൻസ്​ വൈസ്​ പ്രസിഡന്‍റ്​ ഉമർ അബ്​ദുല്ല ആരോപിച്ചു. സർക്കാറിന്‍റെ യഥാർഥലക്ഷ്യങ്ങൾ വീണ്ടും പുറത്തുവരുകയാണ്​.

ലഡാക്കിലെ ജനങ്ങളുടെ ഭൂമി, ജോലി, താമസനിയമങ്ങൾ, വ്യക്​തിവിവരങ്ങൾ എന്നിവ സുരക്ഷിതമാക്കുമെന്ന്​ വാഗ്ദാനം ചെയ്യുമ്പോൾ, ജമ്മുവിനെയും കശ്​മീരിനെയും വിൽപനക്ക്​ വെക്കുകയാണ്​ സർക്കാർ​. ഇതിനെതിരെ ജാഗ്രത പുലർത്തണമെന്നും ഒമർ ട്വീറ്റ് ചെയ്തു.

അതേസമയം, റിയൽ എസ്​റ്റേറ്റ്​ സമ്മിറ്റ്​ വഴി സമീപ ഭാവിയിൽ 60,000 കോടിയുടെ നിക്ഷേപമാണ്​ സ്വീകരിക്കാൻ പോകുന്നതെന്ന്​ ലഫ്​റ്റനന്‍റ്​ ഗവർണർ മനോജ്​ സിൻഹ പറഞ്ഞു. ജമ്മു കശ്മീരിൽ ഭൂമിയോ രണ്ടാമത്തെ വീടോ വാങ്ങാൻ രാജ്യത്തുടനീളമുള്ള ആളുകളെ പ്രോത്സാഹിപ്പിക്കാൻ കേന്ദ്രവും ജമ്മു കശ്മീർ ഭരണകൂടവും ചേർന്ന് ജമ്മുവിലാണ്​ ആദ്യത്തെ റിയൽ എസ്റ്റേറ്റ് ഉച്ചകോടി സംഘടിപ്പിച്ചത്​. അടുത്ത വർഷം മേയിൽ ശ്രീനഗറിൽ സമാനമായ പരിപാടി നടക്കുമെന്ന് ലഫ്റ്റനന്‍റ്​ ഗവർണർ പറഞ്ഞു.