മലയാളി സംഘടനകളും കെജ്​രിവാളും അഭ്യർഥിച്ചു; ഡൽഹിക്ക്​ കേരളം ഓക്​സിജൻ നൽകും

ന്യൂഡൽഹി: കോവിഡ്​ പ്രതിസന്ധി രൂക്ഷമായ സാഹചര്യത്തിൽ രാജ്യതലസ്​ഥാനം ഓക്​സിജൻ ദൗർലഭ്യത്തിൽ വലയു​​േമ്പാൾ ഓക്​സിജൻ നൽകാൻ തയാറാണെന്ന്​ കേരളം. ഡൽഹി മുഖ്യമന്ത്രി അരവിന്ദ്​ കെജ്​രിവാളിന്‍റെയും മലയാളി സംഘടനകളുടെയും അഭ്യർഥനയെ തുടർന്നാണ്​ ഓക്​സിജൻ കയറ്റി അയക്കാനുള്ള തീരുമാനം.

ഡൽഹിക്ക്​ ഓക്​സിജൻ നൽകാൻ കേരളം തയാറാണെന്ന്​ ചീഫ്​ സെക്രട്ടറി വി.പി. ജോയ്​ പറഞ്ഞതായി ദേശീയമാധ്യമങ്ങൾ റിപ്പോർട്ട്​ ചെയ്​തു. കേരളം ഡൽഹിക്ക്​ ഓക്​സിജൻ നൽകാൻ തയാറാണ്​. എന്നാൽ ഡൽഹിയി​ലേക്ക്​ എങ്ങനെ ​ഓക്​സിജൻ കൊണ്ടുപോകുമെന്നതാണ്​ വെല്ലുവിളിയെന്നും ചീഫ്​ സെക്രട്ടറി പറഞ്ഞു. ഓക്​സിജൻ അയക്കുന്നതുമായി ബന്ധപ്പെട്ട്​ ഡൽഹി ചീഫ്​ സെ​ക്രട്ടറി വിജയ്​ കുമാറുമായി ചർച്ച നടത്തുമെന്നും അദ്ദേഹം പറഞ്ഞു.

ഡൽഹിക്ക്​ ഓക്​സിജൻ ലഭ്യമാക്കണമെന്നാവശ്യപ്പെട്ട്​ എല്ലാ മുഖ്യമന്ത്രിമാർക്കും അരവിന്ദ്​ കെജ്​രിവാൾ കത്തയച്ചിരുന്നു. കത്ത്​ കിട്ടിയതോടെ ഡൽഹിക്ക്​ ഓക്​സിജൻ നൽകുന്നതിന്‍റെ സാധ്യത പരിശോധിക്കാൻ​ ചീഫ്​ സെക്രട്ടറി ഉൾപ്പെടെയുള്ളവരോട്​ മുഖ്യമന്ത്രി പിണറായി വിജയൻ നിർദേശിക്കുകയായിരുന്നു.

ചീഫ്​ സെക്രട്ടറി തലത്തിൽ ചർച്ചകൾ പുരോഗമിക്കുകയാണെന്നാണ്​ വിവരം. ഡൽഹിയിൽ കോവിഡ്​ സംബന്ധിച്ച ചുമതലയുള്ള ഉപമുഖ്യമന്ത്രി മനീഷ്​ സിസോദിയ കേരള മുഖ്യമന്ത്രിയുടെ ഓഫിസുമായി നിരന്തരം ബന്ധപ്പെടുന്നുണ്ടെന്നും അറിയിച്ചു.

ഡൽഹിയിലെ മലയാളി സംഘടനയായ ജന സംസ്​കൃതി ഓക്​സിജൻ ലഭ്യമാക്കണമെന്ന്​ ആവശ്യപ്പെട്ട്​ പിണറായി വിജയന്​ കത്തെഴുതിയിരുന്നു. ഡൽഹി മലയാളികളുടെ ആരോഗ്യ സുരക്ഷ ഉറപ്പാക്കണമെന്നും അവർ ആവശ്യപ്പെട്ടിരുന്നു.

കൂടാതെ മറ്റൊരു സംഘടനയായ ഡിസ്​ട്രസ്​ മാനേജ്​മെന്‍റ്​ കലക്​ടീവ്​ പിണറായി വിജയൻ, ആരോഗ്യമന്ത്രി കെ.കെ. ശൈലജ, ചീഫ്​​ സെക്രട്ടറി എന്നിവർക്ക്​ ഡൽഹി മലയാളികളുടെ കാര്യത്തിൽ ഇടപെടണമെന്നാവശ്യപ്പെട്ട്​ കത്തയച്ചിരുന്നു. ഓക്​സിജൻ സൗകര്യം ലഭ്യമാക്കണമെന്നും അവർ ആവശ്യപ്പെട്ടിരുന്നു.

നേരത്തേ 20,000 ലിറ്റർ ലിക്വിഡ്​ ഒാക്​സിജൻ ഗോവക്ക്​ നൽകിയിരുന്നു. ഇതിന്​ ഗോവ ആരോഗ്യ മന്ത്രി വിശ്വജിത്ത്​ റാണെ നന്ദി അറിയിക്കുകയും ചെയ്​തിരുന്നു.