ശ്രീനഗറിൽ കനത്ത മഞ്ഞുവീഴ്ച; കോൺഗ്രസ്​ എം.പിമാർക്ക്​​ പാർലമെന്‍റിൽ എത്താനായില്ല

ന്യൂഡൽഹി: കനത്ത മഞ്ഞുവീഴ്​ച​യെ തുടർന്ന്​ ശ്രീനഗറിൽ കുടുങ്ങിയ കോൺഗ്രസ്​ അധ്യക്ഷനും രാജ്യസഭ പ്രതിപക്ഷനേതാവുമായ മല്ലികാർജുൻ ഖാർഗെ, ലോക്സഭ ​പ്രതിപക്ഷ കക്ഷി നേതാവ്​ അധീർ രഞ്ജൻ ചൗധരി, രാഹുൽ ഗാന്ധി, കെ.സി. വേണുഗോപാൽ, ജയ്​റാം രമേശ്​ അടക്കമുള്ള കോൺഗ്രസ്​ എം.പിമാർക്ക്​ പാർലമെന്‍റ്​ ബജറ്റ്​ സമ്മേളനത്തിന്‍റെ ആദ്യ ദിവസം എത്താനായില്ല. രാഷ്ട്രപതിയുടെ നയപ്രഖ്യാപന പ്രസംഗം, സാമ്പത്തിക സർവേ സഭയുടെ മേശപ്പുറത്തു​ വെക്കൽ എന്നിവയായിരുന്നു ചൊവ്വാഴ്ച പാർലമെന്‍റിൽ.

തിങ്കളാഴ്ച ശ്രീനഗറിൽ രാഹുൽ ഗാന്ധി നയിച്ച ഭാരത്​ ജോഡോ യാത്രയുടെ സമാപന സമ്മേളനത്തിന് എത്തിയതായിരുന്നു ​ നേതാക്കൾ. ചൊവ്വാഴ്ച രാവിലെ എട്ടരക്കുള്ള വിമാനത്തിൽ ഡൽഹിക്കു​ പുറപ്പെടാനായിരുന്നു തീരുമാനം. എന്നാൽ, പ്രതികൂല കാലാവസ്​ഥയെ തുടർന്ന്​ ശ്രീനഗറിൽനിന്നുള്ള വിമാനം വൈകുന്നതിനാൽ മല്ലികാർജുൻ ഖാർഗെ അടക്കമുള്ള നിരവധി പേർക്ക്​ പാർലമെന്‍റിൽ രാഷ്​ട്രപതിയുടെ നയപ്രഖ്യാപന പ്രസംഗത്തിന്​ എത്താനാകില്ലെന്ന്​ കോൺഗ്രസ്​ വക്താവ്​ ജയ്​റാം രമേശ്​ ചൊവ്വാഴ്ച രാവിലെ ട്വീറ്റ്​ ചെയ്തു. ഡൽഹിയിലുള്ള സോണിയ ഗാന്ധി അടക്കമുള്ള നേതാക്കൾ പാർലമെന്‍റിൽ എത്തി.