മമതയെ 'പുറംനാട്ടുകാരി' എന്നുവിളിച്ചു, കെ.എൽ.ഒ മേധാവിക്കെതിരെ യു.എ.പി.എയും രാജ്യദ്രോഹക്കുറ്റവും ചാർത്തി കേസെടുത്തു

കൊൽക്കത്ത: മുഖ്യമന്ത്രി മമത ബാനർജിയെ 'പുറംനാട്ടുകാരി' എന്നുവിളിച്ച്​ അപഹസിച്ച​ കെ.എൽ.ഒ മേധാവിക്കെതിരെ യു.എ.പി.എ ചാർത്തി കേസെടുത്തു. നിരോധിത സംഘടനയായ കംതാപൂർ ലിബറേഷൻ ഓർഗനൈസേഷൻ (കെ.എൽ.ഒ) മേധാവി ജിബോൺ സിംഗക്കെതിരെയാണ്​ യു.എ.പി.എയും രാജ്യദ്രോഹക്കുറ്റവു​ം ചുമത്തി കേസെടുത്തത്​. പശ്ചിമ ബംഗാളിന്‍റെ വടക്കൻ പ്രദേശങ്ങൾ ഉൾപെടുത്തി പുതിയ സംസ്​ഥാനം രൂപവത്​കരിക്കണമെന്നും​ സിംഗ ആവശ്യമുന്നയിച്ചിരുന്നു.

പശ്ചിമ ബംഗാൾ, കേന്ദ്ര സർക്കാറുകൾ 'വിദേശ' സർക്കാറ​ു​കളാണെന്നത്​ ഉൾപെടെ ഒളിവിലിരുന്ന്​ സിംഗ നടത്തിയ അഭിപ്രായ പ്രകടനങ്ങളുടെ വിഡിയോ ദൃശ്യങ്ങൾ സോഷ്യൽ മീഡിയയിൽ ​ൈവറലായിരുന്നു. ഇതോടെയാണ്​ ബംഗാൾ സ്​പെഷൽ ടാസ്​ക്​ ഫോഴ്​സ്​ രാജ്യദ്രോഹ കേസ്​ ചുമത്തിയത്​. ബംഗാളിന്‍റെ വടക്കൻ പ്രദേശങ്ങൾ ഉൾപെടുത്തി സംസ്​ഥാനം രൂപവത്​കരിക്കണമെന്ന കേന്ദ്ര മന്ത്രി ജോൺ ബാർലയുടെ അഭിപ്രായത്തെ കെ.എൽ.ഒ മേധാവി പിന്തുണക്കുകയും ചെയ്​തു. വടക്കൻ ബംഗാളിനെ കേന്ദ്ര ഭരണ പ്രദേശമായി മാറ്റണമെന്ന്​ പരസ്യമായി ആവശ്യപ്പെട്ടുകൊണ്ടിരുന്ന ബാർലയെ ഇക്കഴിഞ്ഞ പുനഃസംഘടനയിലാണ്​ കേന്ദ്ര മന്ത്രിസഭയിൽ ഉൾപെടുത്തിയത്​.

'ഇത്തരം കാര്യങ്ങൾ പലതും പറയുന്ന ആ വിഡിയോയെ അടിസ്​ഥാനമാക്കിയാണ്​ ജിബോൺ സിംഗക്കെതിരെ കേസ്​ എടുത്തത്​. വിഡിയോയുടെ ഉറവിടം ഞങ്ങൾ അന്വേഷിച്ചുകൊണ്ടിരിക്കുകയാണ്​.' -ടാസ്​ക്​ ഫോഴ്​സ്​ ഉദ്യോഗസ്​ഥരിലൊരാൾ പറഞ്ഞു.

1995ൽ രൂപം കൊണ്ട കെ.എൽ.ഒയെ ഭീകരവാദ ഗ്രൂപ്പായി കേന്ദ്രം പ്രഖ്യാപിച്ചിട്ടുണ്ട്​. ഓൾ കംതാപൂർ സ്റ്റുഡന്‍റ്​സ്​ യൂനിയൻ (എ.കെ.എസ്​.യു) പ്രവർത്തകരായിരുന്ന ചിലരാണ്​ സംഘടനക്ക്​ പിന്നിൽ. കംതാപൂർ പ്രത്യേക രാജ്യമായി പ്രഖ്യാപിക്കണമെന്നാവശ്യപ്പെട്ട്​ സായുധ സമരവുമായി ഇവർ രംഗത്തിറങ്ങുകയായിരുന്നു. ബംഗാളിലെ ജില്ലകളായ കൂച്ച്​ ബിഹാർ, ഡാർജിലിങ്​, ജയ്​പാൽഗുഡി, ഉത്തർ ദിനാജ്​പൂർ, ദക്ഷിൺ ദിനാജ്​പൂർ, മാൽഡ അസമിലെ നാലു ജില്ലകൾ, ബിഹാറിലെ കിഷൻഗഞ്ച്​, നേപ്പാളിലെ ഝാപ ജില്ല എന്നിവ ഒന്നിച്ചുചേർത്ത്​ കംതാപൂർ രാജ്യം ​വേണമെന്നായിരുന്നു ഇവരുടെ ആവശ്യം.