രാജസ്ഥാനിൽ മയക്കുമരുന്ന്​ റാക്കറ്റ്​ നടത്തുന്ന സ്​ത്രീ അറസ്​റ്റിൽ

ജോധ്പുർ: രാജസ്ഥാനിൽ മയക്കുമരുന്നായ കറുപ്പ്​ വിൽപന നടത്തുന്ന റാക്കറ്റിലെ പ്രധാനിയായ സുമിത്ര ബിഷ്​നോയ്​ അറസ്​റ്റിൽ. വൻ റാക്കറ്റായി ഗ്രാമങ്ങളിൽ  കറുപ്പ്​ വിൽപന നടത്തി വന്നിരുന്ന ഇവർ ആഡംബരവാഹനങ്ങളും നാലു നിലകളുള്ള  ബംഗളാവുമുൾപ്പെടെയുള്ള സ്വത്തുക്കൾ സ്വന്തമാക്കിയിരുന്നു.

31 കാരിയായ സുമിത്രയാണ്​ റാക്കറ്റിനെ നിയന്ത്രിച്ചിരുന്നത്​. ബുധനാഴ്​ച മയക്കുമരുന്ന്​ കടത്തുമായി ബന്ധപ്പെട്ട്​ രണ്ടു പേരെ പൊലീസ്​ അറസ്​റ്റ്​ ചെയ്​തതാണ്​സുമിത്രയിലേക്കുള്ള അന്വേഷണത്തിന്​ വഴിത്തിരിവായത്​. സുമിത്രക്ക്​ വേണ്ടിയാണ്​ കറുപ്പ്​ കടത്തിയതെന്നു അവർ മൊഴി നൽകി. തുടർന്ന് ​50 പൊലീസുകാരടങ്ങിയ സംഘം ജോധ്​പുരിലെ ബൊറാനദയിലുള്ള സുമിത്രയുടെ വസതിയിൽ റെയ്​ഡ്​ നടത്തുകയും അവരെ അറസ്​റ്റു ചെയ്യുകയുമായിരുന്നു.

76 ഗ്രാം കറുപ്പാണ്​ സുമിത്രയുടെ പക്കലിൽ നിന്നും പൊലീസ്​ പിടികൂടിയത്​.  ജി.പി. എസ്​ സിസ്​റ്റം,  മയക്കുമരുന്ന്​ കടത്താൻ ഉപയോഗിച്ചിരുന്ന വാഹനവ്യുഹം എന്നിവ പിടിച്ചെടുത്ത്​ വീട്​ ​പൊലീസ്​ സീൽ ചെയ്​തു. സുമിത്ര ബിഷ്​നോയ്​യുടെ നാലു സഹായികളെ അറസ്​റ്റു ചെയ്​തിട്ടുണ്ട്​. റാക്കറ്റിൽ ഉൾപ്പെട്ടവർക്കു വേണ്ടി അന്വേഷണം തുടങ്ങിയിട്ടുണ്ട്.