ല​ഖിം​പു​ർ കർഷക കൊല: മന്ത്രിപുത്രൻ ആശിഷ്​ മിശ്ര നാളെ ചോദ്യം ചെയ്യലിന്​ ഹാജരാകും

ന്യൂഡൽഹി: ഉ​ത്ത​ർ​പ്ര​ദേ​ശി​ലെ ല​ഖിം​പു​ർ ഖേ​രി​യി​ൽ ക​ർ​ഷ​ക​രെ കാ​ർ ക​യ​റ്റിക്കൊന്ന സംഭവത്തിൽ കേന്ദ്രമന്ത്രി അജയ്​ മിശ്രയുടെ മകൻ ആശിഷ്​ മിശ്ര നാളെ ചോദ്യം ചെയ്യലിന്​ ഹാജരാകും. ശനിയാഴ്ച രാവിലെ 11 മണിക്ക്​ പ്രത്യേക അന്വേഷണ സംഘത്തിന്​ മുന്നിൽ ചോദ്യം ചെയ്യലിന്​ ഹാജരാകുമെന്ന്​ ആശിഷിന്‍റെ അഭിഭാഷകൻ അറിയിച്ചു.

ചോദ്യം ചെയ്യലിന്​ ആശിഷിന്​ നോട്ടീസ്​ നൽകിയിട്ടുണ്ടെന്നും എത്തിയില്ലെങ്കിൽ നടപടി സ്വീകരിക്കുമെന്നും ഉത്തർപ്രദേശ്​ സർക്കാറിന് വേണ്ടി ഹാജരായ അഭിഭാഷകൻ ഹരീഷ്​ സാൽവെ കോടതിയെ അറിയിച്ചു.

കേസിൽ യു.പി സർക്കാറിനെതിരെ സുപ്രീം കോടതി ആഞ്ഞടിച്ചു. സംഭവത്തെ ക്രൂരമായ കൊലപാതകമെന്ന്​ വിശേഷിപ്പിച്ച കോടതി കേസിൽ യു.പി സർക്കാർ കൈകൊണ്ട നടപടികളിൽ തൃപ്​തിയില്ലെന്ന്​ അറിയിച്ചു. ആശിഷ്​ മിശ്രക്കെതിരായ ആരോപണങ്ങൾ ഗുരുതരമാണെന്നും നടപടികൾ എന്തുകൊണ്ടാണ്​ വാക്കിൽ ഒതുങ്ങുന്നതെന്നും​ കോടതി ചോദിച്ചു. പൂജ അവധി കഴിഞ്ഞ്​ കേസ്​ വീണ്ടും പരിഗണിക്കു​​േമ്പാൾ ശക്​തമായ നടപടി സ്വീകരിക്കണമെന്ന്​ കോടതി ഉത്തരവിട്ടു.

യു.പിയിലെ ലഖിംപൂർ ഖേരിയിൽ കർഷകർക്ക്​ ഇടയിലേക്ക്​ കേന്ദ്ര ആഭ്യന്തര സഹമന്ത്രി അജയ്​ മിശ്രയുടെ മകൻ ആശിഷ്​ മിശ്ര കാർ ഒടിച്ചുകയറ്റിയതിനെ തുടർന്നുണ്ടായ സംഘർഷത്തിൽ നാലു കർഷകരടക്കം ഒമ്പതുപേർ കൊല്ലപ്പെട്ടിരുന്നു.

പ്രതിപക്ഷമായ കോൺഗ്രസ്​ ലഖിംപൂർ ഖേരി വിഷയം ആളിക്കത്തിക്കുകയും ചെയ്​തിരുന്നു. യു.പി ഭരിക്കുന്ന യോഗി ആദിത്യനാഥ്​ സർക്കാറിനെതിരെയും കേന്ദ്രസർക്കാറിനെതിരെയുമായിരുന്നു പ്രതിഷേധം. കേന്ദ്രമന്ത്രി അജയ്​ മിശ്രയുടെ രാജിയും ആശിഷ്​ മിശ്രയുടെ അറസ്റ്റും പ്രതിപക്ഷം ആവശ്യപ്പെട്ടിരുന്നു. സംഭവത്തിൽ രണ്ടുപേരെ അറസ്റ്റ്​ ചെയ്യുകയും ചെയ്​തിരുന്നു.