ലഖിംപൂർ ഖേരി; കർഷകർക്ക്​ ഐക്യദാർഢ്യവുമായി കോൺഗ്രസിന്‍റെ രാജ്യവ്യാപക പ്രതിഷേധം

ലഖ്​​േനാ: ഉത്തർപ്രദേശ്​ ലഖിംപൂർ ഖേരി സംഘർഷത്തിൽ കോൺഗ്രസിന്‍റെ രാജ്യവ്യാപക പ്രതിഷേധം ചൊവ്വാഴ്ച. കർഷകർക്ക്​ ഐക്യദാർഢ്യം പ്രഖ്യാപിച്ച്​ ജില്ല കലക്​ടർമാരുടെ ഓഫിസിന്​ മുന്നിൽ പ്രതിഷേധം സംഘടിപ്പിക്കാൻ പാർട്ടി പ്രവർത്തകരോട്​ ആഹ്വാനം ചെയ്​തു. കൂടാതെ അക്രമത്തിന്‍റെ ഉത്തരവാദികൾക്കെതിരെ നടപടി സ്വീകരിക്കണമെന്നും ആവശ്യപ്പെട്ടു.

രാജ്യത്തെ മുഴുവൻ കർഷകർക്കും പിന്തുണയുമായി കോൺഗ്രസ്​ നിലക്കൊള്ളുമെന്ന്​ മുതിർന്ന പാർട്ടി നേതാവ്​ രാജീവ്​ ശുക്ല പറഞ്ഞു. പ്രധാനമന്ത്രി നരേന്ദ്രമോദിയും യു.പി മുഖ്യമന്ത്രി യോഗി ആദിത്യനാഥും ഉത്തരവാദികൾക്കെതിരെ കർശന നടപടി സ്വീകരിക്കണം. സർക്കാർ കർഷകർക്ക്​ ഒപ്പമല്ലെന്ന തോന്നൽ സൃഷ്​ടിക്കരുതെന്നും അദ്ദേഹം പറഞ്ഞു.

തടങ്കലിലാക്കിയ കോൺഗ്രസ്​ നേതാവ്​ പ്രിയങ്ക ഗാന്ധിയെ വിട്ടയക്കണം. കൂടാതെ പഞ്ചാബ്​ മുഖ്യമന്ത്രി ചരൺജിത്​ സിങ്​ ചന്നിയെയും ഛത്തീസ്​ഗഡ്​ മുഖ്യമന്ത്രി ഭൂപേഷ്​ ബാഗലിനെയും ലഖിംപൂർ ഖേരി സന്ദർശിക്കാൻ അനുവദിക്കണമെന്നും അദ്ദേഹം ആവശ്യപ്പെട്ടു. ലഖിംപൂർ ഖേരിയെ സന്ദർ​ശിക്കാൻ ഒരുങ്ങവെയാണ്​ പ്രിയങ്ക ഗാന്ധിയെ യു.പി പൊലീസ്​ തടഞ്ഞുവെക്കുന്നത്​. 24മണിക്കൂറായി യു.പി ​െപാലീസിന്‍റെ അന്യായ തടങ്കലിലാണ്​ പ്രിയങ്ക.

ലഖിംപൂർ ഖേരിയിൽ അരങ്ങേറിയ അക്രമ സംഭവങ്ങളിൽ നാലുകർഷകർ അടക്കം ഒമ്പതുപേരാണ്​ കൊല്ലപ്പെട്ടത്​. ഒരു മാധ്യമപ്രവർത്തകനും മരിച്ചവരിൽ ഉൾപ്പെടും. കേന്ദ്രമന്ത്രി അജയ്​ മിശ്രയുടെ മകൻ ആശിഷ്​ മിശ്ര ഓടിച്ച കാർ കർഷകരുടെ ഇടയിലേക്ക്​ പാഞ്ഞുകയറുകയായിരുന്നു. തുടർന്നുണ്ടായ സംഘർഷത്തിൽ നാലു​േപരും കൊല്ലപ്പെട്ടു.