ലഖിംപൂരിലേക്ക്​ ആരെയും അടുപ്പിക്കാതെ യു.പി സർക്കാർ; അഖിലേഷ്​ കുത്തിയിരിപ്പ്​ സമരത്തിൽ, പ്രിയങ്കയെ തടഞ്ഞു...

ലഖ്​നോ: കേന്ദ്ര മന്ത്രിയുടെ മകന്‍റെ വാഹനവ്യൂഹം ഇടിച്ചു കയറ്റി കർഷരെ കൊല ചെയ്​ത ലഖിംപൂർ ഖേരിയിലേക്ക്​ പ്രതിപക്ഷനേതാക്കളെയൊന്നും കടത്തിവിടാതെ യൂ.പി സർക്കാർ. സ്​ഥിതിഗതികൾ നിയന്ത്രണ​വിധേയമാകാതെ ആരെയും ലഖിംപൂർ ഖേരിയിലേക്ക്​ പ്രവേശിപ്പിക്കില്ലെന്നാണ്​ ബി.ജെ.പിയുടെ നേതൃത്വത്തിലുള്ള യു.പി സർക്കാറിന്‍റെ നിലപാട്​.

ലഖിംപൂർ ഖേരിയിലേക്ക്​ പോകാനായി പുറപ്പെട്ട സമാജ്​വാദി പാർട്ടി നേതാവ്​ അഖിലേഷ്​ യാദവിനെ പൊലീസ്​ തടഞ്ഞതിനെ തുടർന്ന്​ വീടിന്​ മുമ്പിൽ കുത്തിയിരുന്ന്​ പ്രതിഷേധിച്ചു. ലഖ്​നോവിലെ അദ്ദേഹത്തിന്‍റെ വസതിക്ക്​ മുന്നിൽ പൊലീസ്​ സേനയെ വിന്യസിച്ചിട്ടുണ്ട്​. ലഖിംപൂർ ഖേരിയിലേക്ക്​ പോകാൻ അനുവദിക്കണമെന്നാവശ്യപ്പെട്ട്​ സമരത്തിലാണ്​ അഖിലേഷ്​.

ഇന്നലെ രാത്രി തന്നെ ലഖിംപൂർ ഖേരിയിലേക്ക്​ പുറപ്പെട്ട കോൺഗ്രസ്​ നേതാവ്​ പ്രിയങ്ക ഗാന്ധിയെ പൊലീസ്​ തടഞ്ഞിരുന്നു. പൊലീസുമായി വാക്​ തർക്കത്തിലേർപ്പെട്ട പ്രിയങ്കയെയും സംഭവസ്​ഥ​ലത്തേക്ക്​ പോകൻ പൊലീസ്​ അനുവദിച്ചിട്ടില്ല.

'നിങ്ങളും നിങ്ങൾ പ്രതിരോധിക്കാൻ ശ്രമിക്കുന്ന സർക്കാറും കൊന്നുകളഞ്ഞ കർഷകരേക്കാൾ പ്രധാനമല്ല ഞാൻ. എന്നെ തടയാൻ നിയമപരമായ വാറന്‍റുണ്ടെങ്കിൽ അതു കാണിക്കൂ. കൊല്ലപ്പെട്ടവരുടെ കുടുംബത്തെ സന്ദർശിക്കാനാണ്​ ഞാൻ വന്നത്​. അല്ലാതെ കുറ്റമൊന്നും ചെയ്​തിട്ടില്ല. എന്തിനാണ്​ എന്നെ തടയുന്നത്​. ഈ രാജ്യം കർഷകരുടേതാണ്​, ബി​.ജെ.പിയുടേതല്ല' -തന്നെ തടഞ്ഞ പൊലീസിനോട്​ പ്രിയങ്ക പറഞ്ഞു.

ചത്തീസ്​ഗഢ്​ മുഖ്യമന്ത്രി ഭൂപേഷ്​ ഭാഗൽ, പഞ്ചാബ്​ ഉപമുഖ്യമന്ത്രി എസ്​.എസ്​ രൺദവ തുടങ്ങിയവർക്കൊന്നും ലഖിംപൂർ ഖേരിയിലേക്ക്​ യോഗി ആദിഥ്യ നാഥിന്‍റെ യു.പി സർക്കാർ യാത്രാ അനുമതി നൽകിയിട്ടില്ല. ഭൂപേഷ്​ ഭാഗലിന്‍റെ വിമാനത്തിന്​ യു.പിയിൽ ഇറങ്ങാനുള്ള അനുമതി നൽകിയിട്ടില്ല.

Also Read:'നിങ്ങൾ കൊന്നുകളഞ്ഞ കർഷകരേക്കാൾ പ്രധാനമല്ല ഞാൻ; ഈ രാജ്യം കർഷകരുടേതാണ്​, ബി​.ജെ.പിയുടേതല്ല' -പൊലീസിനോട്​ കയർത്ത്​ പ്രിയങ്ക

സംഭവസ്​ഥലം സന്ദർശിക്കാനൊരുങ്ങിയ ദലിത്​ നേതാവ്​ ചന്ദ്രശേഖർ ആസാദിനെയും പൊലീസ്​ തടഞ്ഞിട്ടുണ്ട്​.