ഹിമാചലിൽ ദേശീയപാതയിൽ വാഹനങ്ങൾക്ക്​ മുകളിലേക്ക്​ മണ്ണിടിഞ്ഞു; 11 മരണം; 13 പേ​രെ രക്ഷപ്പെടുത്തി -വിഡിയോ

ഷിംല: ഹിമാചൽപ്രദേശിലെ കിന്നൗർ ജില്ലയിൽ ബുധനാഴ്​ചയുണ്ടായ മണ്ണിടിച്ചിലിൽ 11 പേർ കൊല്ലപ്പെട്ടു. 13 പേരെ പരിക്കുകളോടെ രക്ഷപ്പെടുത്തിയതായി കിന്നൗർ ഡെപ്യൂട്ടി കമീഷണർ ആബിദ്​ ഹുസൈൻ സാദിഖ്​ പറഞ്ഞു. ബസ്​ ഉൾപ്പെടെയുള്ള വാഹനങ്ങൾക്ക്​ മുകളിലേക്ക്​ മണ്ണിടിഞ്ഞ്​​ വീണ്​ 40ലേറെ പേ​െര കാണാതായി​. കിന്നൗറിലെ ചൗര ​ഗ്രാമത്തി​ലുള്ള ദേശീയപാതയിൽ പകൽ​ 11.50ഓടെയാണ്​ സംഭവമെന്ന്​ ഹിമാചൽ ദുരന്തനിവാരണ വിഭാഗം ഡയറക്​ടർ സദേഷ്​ കുമാർ മൊഖ്​ത പറഞ്ഞു.

മണ്ണിനടിയിൽ 60 പേർ വരെ അകപ്പെട്ടിരിക്കാമെന്ന്​ ഹിമാചൽ മുഖ്യമന്ത്രി ജയ്​ റാം ഠാകുർ നിയമസഭയിൽ പറഞ്ഞു. അപകടം സംബന്ധിച്ച്​ കേന്ദ്ര ആഭ്യന്തരമന്ത്രി അമിത്​ ഷായുമായി സംസാരിച്ചതായി അദ്ദേഹം പറഞ്ഞു. ഹിമാചൽ റോഡ്​ ട്രാൻസ്​പോർട്ട്​ കോർപറേഷ​‍െൻറ ബസുൾപ്പെടെയുള്ള വാഹനങ്ങളാണ്​ മണ്ണിനടിയിൽ പെട്ടത്​. ഡ്രൈവർക്കും കണ്ടക്​ടർക്കും പുറമെ 11 പേരെ കൂടി പരിക്കുകളോടെ രക്ഷപ്പെടുത്തിയിട്ടുണ്ട്​.

അപകടത്തി​‍െൻറ ആഘാതത്തിലായതിനാൽ ബസിൽ എത്രപേരുണ്ടായിരുന്നുവെന്ന്​ പറയാവുന്ന അവസ്ഥയിലല്ല ഡ്രൈവറും കണ്ടക്​ടറും. ദേശീയ ദുരന്തനിവാരണ സേന, ഇന്തോ-തിബത്തൻ പൊലീസ്​, സി.ഐ.എസ്​.എഫ്​, പൊലീസ്​ എന്നിവർ രക്ഷാപ്രവർത്തനത്തിന്​ രംഗത്തുണ്ട്​. 40 യാത്രക്കാരുമായി കിന്നൗറിൽനിന്ന്​ ഷിംലയിലേക്ക്​ പോവുകയായിരുന്നു ബസ്​.