കോവിഡ്​ വ്യാപനം; ആശുപത്രിയിൽനിന്ന്​ ഓക്​സിജൻ സിലിണ്ടറുകൾ കൊള്ളയടിച്ച്​ ജനങ്ങൾ

ഭോപാൽ: മധ്യ​പ്രദേശിൽ ഓക്​സിജൻ ക്ഷാമമില്ലെന്ന്​ സർക്കാർ വ്യക്തമാക്കിയതിന്​ പിന്നാലെ ആശുപത്രിയിലെ ഓക്​സിജൻ സംഭരണ മുറി കൊള്ളയടിച്ച്​ ജനങ്ങൾ. ദാമോ ജില്ല ആശുപത്രിയിൽനിന്ന്​ ആളുകൾ സിലിണ്ടറുകളുമായി പോകുന്ന ദൃശ്യങ്ങൾ പുറത്തുവന്നു.

വെള്ളിയാഴ്ച രാത്രിയിലാണ്​ സംഭവം. മധ്യപ്രദേശിലെ പ്രധാന കോവിഡ്​ ആശുപത്രികളിലൊന്നാണ്​ ദാമോ ജില്ല ആശുപത്രി. അത്യാസന്ന നിലയിലെത്തുന്ന രോഗികൾക്ക്​ നൽകാനായി ഇവിടെ സൂക്ഷിച്ചിരുന്ന ഓക്​സിജൻ സിലിണ്ടറുകൾ ജനങ്ങൾ തോളിലേറ്റിപോകുകയായിരുന്നു. ഓക്​സിജൻ സിലിണ്ടറുകൾ മോഷണം പോയതോടെ ഡോക്​ടർമാരുടെയും പാരാമെഡിക്കൽ ജീവനക്കാരുടെയും ജോലി തടസപ്പെട്ടു. ആശുപത്രി കാമ്പസിൽ ​െപാലീസ്​ തമ്പടിച്ചതിന്​ ശേഷമാണ്​ ജീവനക്കാർ ജോലി പുനരാരംഭിച്ചത്​.

തിങ്കളാഴ്ചയും സമാന സംഭവം ആശുപത്രിയിൽ അ​രങ്ങേറിയിരുന്നു. പൊലീസിൽ വിവരം അറിയിച്ചെങ്കിലും ആ​ർക്കെതിരെയും കേസെടുത്തിട്ടില്ല. 'തിങ്കളാഴ്ചയിലെ സംഭവത്തിന്​ ശേഷം പൊലീസിനെയും ജില്ല ഭരണകൂടത്തെയും വിവരം അറിയിച്ചിരുന്നു. ​െചാവ്വാഴ്ച വീണ്ടും സംഭവം ആവർത്തിച്ചു. പൊലീസിനെ വീണ്ടും വിവരം അറിയിച്ചിട്ടുണ്ട്​. ഇത്തരം സന്ദർഭങ്ങളിൽ ഡോക്​ടർമാർക്കും ​മറ്റു ജീവനക്കാർക്കും ജോലി ചെയ്യാൻ പ്രയാസകരമാകും' -ദാമോ ജില്ല ആശുപത്രി സിവിൽ സർജൻ ഡോ. മമ്​ത തിമോത്തി പറഞ്ഞു.

ജോലി നിർത്തിവെക്കാൻ തീരുമാനിച്ചിരുന്നെങ്കിലും മാനുഷിക പരിഗണനയെ തുടർന്ന്​ പുനരാരംഭിക്കുകയായിരുന്നുവെന്നും അവർ കൂട്ടിച്ചേർത്തു.

കൊള്ളയടിച്ച സിലിണ്ടറുകൾ തിരികെയെത്തിക്കാൻ നടപടി സ്വീകരിച്ചതായും എന്നാൽ ആരെയും ഇതുവരെ അറസ്റ്റ്​ ചെയ്​തിട്ടില്ലെന്നും ജില്ല കലക്​ടർ തരുൺ രതി അറിയിച്ചു.

ചൊവ്വാഴ്ച സംസ്​ഥാനത്ത്​ ഓക്​സിൻ ദൗർലഭ്യമില്ലെന്ന്​ സർക്കാർ വ്യക്തമാക്കിയിരുന്നു. 390 മെട്രിക്​ ടൺ ഓക്​സിജൻ സിലിണ്ടർ ലഭ്യമായിരുന്നുവെന്നും എന്നാൽ 374 മെട്രിക്​ ടൺ മാത്രമാണ്​ ആവശ്യമായി വന്നതെന്നുമായിരുന്നു പ്രതികരണം. ദാമോയിൽ ചൊവ്വാഴ്ച 85 പേർക്കാണ്​ പുതുതായി കോവിഡ്​ സ്​ഥിരീകരിച്ചത്​. ഇതോടെ ജില്ലയിൽ കോവിഡ്​ ബാധിച്ചവരുടെ എണ്ണം 4162 ആയി. 98 ​േപർക്കാണ്​ ഇവിടെ ജീവൻ നഷ്​ടപ്പെട്ടത്​.