നിരോധനാജ്ഞയും പൊലീസ് ഇടപെടലും; ബാലറ്റ് പേപ്പറിലെ സമാന്തര വോട്ടെടുപ്പിൽനിന്ന് പിന്മാറി നാട്ടുകാർ

മുംബൈ: ബി.ജെ.പി സ്ഥാനാർഥിക്ക് കൂടുതൽ വോട്ട് ലഭിച്ചതിൽ ഇലക്ട്രോണിക് വോട്ടിങ് മെഷീനിൽ സംശയമുന്നയിച്ച് നടത്താനിരുന്ന ബാലറ്റ് പേപ്പറിലെ സമാന്തര വോട്ടെടുപ്പിൽനിന്ന് പിന്മാറി മഹാരാഷ്ട്രയിലെ ഗ്രാമീണർ. സോ​ലാ​പു​ർ ജി​ല്ല​യി​ലെ മ​ൽ​ശി​റാ​സ്​ നി​യ​മ​സ​ഭ മ​ണ്ഡ​ല​ത്തി​ൽ​പെ​ട്ട മാ​ർ​ക​ഡ്​​വാ​ഡി​യി​ലെ ഗ്രാമവാസികളാണ് ബാലറ്റ് പേപ്പർ വോട്ടെടുപ്പിൽനിന്ന് പിന്മാറിയത്. പൊലീസ് വിന്യാസവും നിരോധനാജ്ഞ പ്രഖ്യാപിക്കുകയും ചെയ്തതോടെയാണ് പിന്മാറ്റം. വ്യാ​ഴാ​ഴ്ച​വ​രെ പ്ര​ദേ​ശ​ത്ത്​ നിരോധനാജ്ഞ ഏർപ്പെടുത്തുകയും ചെയ്തിട്ടുണ്ട്.

എൻ.സി.പിയുടെ (എസ്.പി) ഉത്തംറാവു ജാൻകർ ബി.ജെ.പിയുടെ മുൻ എം.എൽ.എ രാം സത്പുതേയെ പരാജയപ്പെടുത്തിയ മ​ൽ​ശി​റാ​സ് മണ്ഡലത്തിന് കീഴിലാണ് മാ​ർ​ക​ഡ്​​വാ​ഡി​ ഗ്രാമം. തെരഞ്ഞെടുപ്പിൽ ജാൻകർ വിജയിച്ചെങ്കിലും ബി.ജെ.പി സ്ഥാനാർഥിക്ക് മാ​ർ​ക​ഡ്​​വാ​ഡി​ ഗ്രാമത്തിൽ ലീഡ് ലഭിച്ചതാണ് നാട്ടുകാരിൽ സംശയത്തിനിടയാക്കിയത്. ഗ്രാമത്തിൽനിന്നും ഒരിക്കലും ബി.ജെ.പി സ്ഥാനാർഥി രാം സത്പുതെക്ക് ലീഡ് ലഭിക്കില്ലെന്നാണ് നാട്ടുകാർ പറയുന്നത്.

രാം ​സ​ത്​​പു​തെ​ക്ക്​ 1,003 വോ​ട്ട്​ ലഭിച്ചെന്നാണ് കണക്ക്. എന്നാൽ, 150ലേ​റെ വോ​ട്ട്​ ഗ്രാ​മ​ത്തി​ൽ​നി​ന്ന്​ സ​ത്​​പു​തെ​ക്ക്​ കി​ട്ടി​ല്ലെ​ന്ന്​ നാട്ടുകാർ ഉറപ്പിച്ചു പറയുന്നു. തുടർന്നാണ് തെരഞ്ഞെടുപ്പ് കമീഷന്‍റെ ഡാറ്റയെ വെല്ലുവിളിച്ച് ബാലറ്റ് പേപ്പറിലൂടെ സമാന്തര തെരഞ്ഞെടുപ്പ് നടത്തി ഇക്കാര്യം തെളിയിക്കാൻ ഗ്രാമവാസികൾ തീരുമാനിക്കുകയായിരുന്നു. എന്നാൽ, കടുത്ത നടപടികളുമായി ജില്ല ഭരണകൂടം രംഗത്തെത്തിയതോടെ ഗ്രാമവാസികൾ പിന്മാറുകയായിരുന്നു.