നാല് ആഴ്ചക്കിടെ ലോക്സഭ സമ്മേളിച്ചത്​ 45 മണിക്കൂർ മാത്രം

ന്യൂഡൽഹി: പാർലമെന്‍റ്​ നടപടികൾ തുടർച്ചയായി മുടങ്ങിയതുമൂലം നാലാഴ്ചക്കിടയിൽ ലോക്സഭ സമ്മേളിച്ചത്​ 45 മണിക്കൂർ. 137 മണിക്കൂർ ചേരണമെന്നായിരുന്നു തീരുമാനം. 130 മണിക്കൂർ സമ്മേളിക്കണമെന്ന്​ നിശ്ചയിച്ച രാജ്യസഭക്ക്​ പ്രവർത്തിക്കാൻ കഴിഞ്ഞത്​ 31 മണിക്കൂർ. ലോക്സഭയിൽ എട്ടു ബില്ലുകൾ അവതരിപ്പിച്ചു. ആറെണ്ണം പാസാക്കി. അതേസമയം, നാലാഴ്ചക്കിടയിൽ 29 ചോദ്യങ്ങൾക്ക്​ മാത്രമാണ്​ ബഹളങ്ങൾക്കിടയിൽ മന്ത്രിമാർ മറുപടി പറഞ്ഞത്​.

50 ലക്ഷം കോടി രൂപയുടെ ബജറ്റ്​ സർക്കാർ പാസാക്കിയത്​ വെറും 12 മിനിറ്റുകൊണ്ടാണെന്ന്​ കോൺഗ്രസ്​ അധ്യക്ഷൻ മല്ലികാർജുൻ ഖാർഗെ പറഞ്ഞു. പാർലമെന്‍റ്​ നടത്താൻ താൽപര്യമില്ലാതെ നടപടികൾ തടസ്സപ്പെടുത്തുകയാണ്​ പ്രതിപക്ഷമെന്ന്​ ഭരണപക്ഷം ആരോപിക്കുന്നു. എന്നാൽ, ഭരണപക്ഷം സഭാ നടപടികൾ തടസ്സപ്പെടുത്താൻ ഇറങ്ങി. അദാനി പ്രശ്നത്തിന്​ മറുപടി പറയാതെ, ബ്രിട്ടനിൽ രാഹുൽ ഗാന്ധി നടത്തിയ പരാമർശങ്ങൾക്ക്​ മാപ്പു പറയണമെന്ന്​ ആവശ്യപ്പെട്ടു ബഹളംവെക്കുകയാണ്​ ഭരണപക്ഷം ചെയ്തത്​.

ജനാധിപത്യ തത്ത്വങ്ങൾ കാറ്റിൽ പറത്തുകയാണ്​ സർക്കാർ. രാഹുൽ ഗാന്ധിയുടെ ലോക്സഭാംഗത്വം ഞൊടിയിടക്കുള്ളിൽ അസാധുവാക്കി. മൂന്നു വർഷത്തെ തടവിന്​ ശിക്ഷിക്കപ്പെട്ട അംറേലിയിലെ ബി.ജെ.പി എം.പിയെ 16 ദിവസം കഴിഞ്ഞിട്ടും അയോഗ്യനാക്കിയില്ല -ഖാർഗെ പറഞ്ഞു.

രാഹുൽ ഗാന്ധിക്കു വേണ്ടിയാണ്​ കോൺഗ്രസും കൂട്ടാളികളും പാർലമെന്‍റ്​ സ്തംഭിപ്പിച്ചതെന്ന്​ നിയമമന്ത്രി കിരൺ റിജിജു കുറ്റപ്പെടുത്തി. കറുത്ത വേഷം ധരിച്ചെത്തിയവർ പാർലമെന്‍റിനെ അപമാനിക്കുകയാണ്​ ചെയ്തതെന്നും അദ്ദേഹം പറഞ്ഞു.