വീണ്ടും ഇരുട്ടടി; വാണിജ്യ പാചക വാതക വില 102 രൂപ കൂട്ടി

ന്യൂഡൽഹി: രാജ്യത്ത് വാണിജ്യ പാചക വാതക വില വർധിപ്പിച്ചു. 19 കിലോഗ്രാം വാണിജ്യ എൽ.പി.ജി സിലിണ്ടറിന് ഇന്ന് 102.5 രൂപയാണ് കൂട്ടിയത്. ഇതോടെ നേരത്തെയുണ്ടായിരുന്ന 2,253 രൂപയിൽനിന്ന് വില 2,355 രൂപയായി ഉയർന്നു. അഞ്ച് കിലോ എൽ.പി.ജി സിലിണ്ടറിന്‍റെ വില 655 രൂപയാണ്.

ഏപ്രിൽ ഒന്നിനാണ് 19 കിലോഗ്രാം വാണിജ്യ എൽ.പി.ജി സിലിണ്ടറിന് 250 രൂപ വർധിപ്പിച്ച് 2,253 രൂപയിലെത്തിച്ചത്. സമാന രീതിയിൽ മാർച്ച് ഒന്നിനും 105 രൂപ വർധിപ്പിച്ചിരുന്നു.