മൂന്ന്​ കിലോമീറ്ററിന്​ 3000 വേണമെന്ന്​ ആംബുലൻസുകൾ: അമ്മയുടെ മൃതദേഹം മകൻ ശ്​മശാനത്തിലെത്തിച്ചത്​ സൈക്കിൾ റിക്ഷയിൽ

ലുധിയാന: ആശുപത്രികളിൽ കോവിഡ്​ ബാധിച്ച്​ മരിച്ചവരെ ശ്​മശാന​ത്തിലേക്ക്​ കൊണ്ടു പോകാൻ വാഹനങ്ങളില്ല. ശ്​മശാനങ്ങ​ളിലേക്ക്​ പോകാനുള്ള വാഹനങ്ങളെ കാത്ത്​ മൃതദേഹങ്ങൾ ലുധിയാന സിവിൽ ആശുപത്രിയിൽ ക്യൂ നിൽക്കുകയാണെന്ന്​ റിപ്പോർട്ടുകൾ. പ്രദേശത്തെ സ്വകാര്യ ആംബുലൻസുകളും മറ്റു വാഹനങ്ങളും മരിച്ചവരുടെ ബന്ധുക്കളെ കൊള്ളയടിക്കുകയാണെന്ന്​ ആശുപത്രി അധികൃതർ പറയുന്നു. ​

മൂന്ന്​ കിലോമീറ്റർ ദൂരമുള്ള ശ്​മശാനത്തിലേക്ക്​ മൃതദേഹം കൊണ്ട്​ പോകാൻ അവർ ആവശ്യപ്പെടുന്നത്​ 2500 മുതൽ 3000 രൂപ വരെയാണ് ആവശ്യപ്പെടുന്നത്​. പലരും കടുത്ത ദാരിദ്ര്യത്തിൽ നിന്ന്​ വരുന്നവരാണ്​. നല്ല രീതിയിൽ സംസ്​കരിക്കാനുള്ള സംവിധാനങ്ങൾ ഒരുക്കാൻ പോലും അവർക്കാകുന്നില്ല. അത്തരക്കാരോടാണ്​ വാഹനഉടമകൾ കൊള്ള വില ചോദിച്ച്​ വില​പേശുന്നത്​.

ആശുപത്രിയിൽ നിന്ന്​ ധോലെവാൾ ഇലക്ട്രിക് ശ്മശാനത്തി​ലേക്ക്​ അധികം ദൂരമില്ല. വാഹനഉടമകൾ ചോദിച്ച പണം നൽകാനില്ലാത്തതിനാൽ 60 വയസ്സുള്ള അമ്മയുടെ മൃതദേഹം മകൻ സൈക്കിൾ റിക്ഷയിൽ കെട്ടിവെച്ചാണ്​ ശ്​മശാനത്തിലേക്ക്​ എത്തിച്ചത്​. മറ്റൊരു 67 കാരനെ ബന്ധുക്കൾ ശ്​മശാനത്തിലെത്തിച്ചത്​ ഓ​ട്ടോറിക്ഷയിലാണ്​. അവർ ആവശ്യപ്പെടുന്നത്​​ 500 രൂപയാണ്​ അതു പോലും കടം വാങ്ങിയാണ്​ പലരും നൽകുന്നത്​.

ആശുപത്രി അധികൃതർ സർക്കാർ ആംബുലൻസ്​ ലഭ്യമാക്കാൻ ശ്രമിച്ചെങ്കിലും നടന്നില്ല. സർക്കാർ സംവിധാനത്തിൽ ആംബുലൻസ്​ വേണമെന്ന്​ ആശുപത്രി അധികൃതർ പലതവണ ആവശ്യപ്പെ​ട്ടെങ്കിലും ഇനിയും നടപടിയായിട്ടില്ലെന്നും മാധ്യമങ്ങൾ റിപ്പോർട്ട്​ ചെയ്യുന്നു.